Oranjestad – Minister Xiomara Maduro ta informa cu e siguiente programa di e Serie di programa ‘Aruba Fuerte y Resiliente, Reactivando nos Economia,’ ta brinda un bista riba tur e trabounan cu Departamento Economico, Comercio y Industria (DEZHI) ta ehecuta. E programa ta consisti di dos parti, e prome parti lo pasa dialuna dia 14 di december y e di dos parti lo continua na januari 2021.
Durante di e prome programa ‘Un bista riba trabounan di DEZHI’, Minister Xiomara Maduro lo duna un splicacion en breve di e Maneho Economico Fuerte y Resiliente 2019-2022. Sigui pa e directora di DEZHI, sra. Maria Dijkhoff-Pita cu lo elabora riba e tareanan di DEZHI. Sra. Mary Baarh cu ta Hefe di Seccion Permiso pa Negoshi ta splica tocante di e digitalisacion di e formulario di permiso pa negoshi. Siguidamente sra. Zulema Dabian-Erasmus, Hefe di e seccion di Relacionan Economico di Exterior y Desaroyo di Negoshi ta brinda informacion riba tur locual DEZHI ta haci pa atrae inversionistanan local y internacional pa bin inverti na Aruba. Sra. Louella Croes-Ras, Funcionario di Maneho na Iniciativa pa Desaroyo pa Empresa Arubano (IDEA) ta splica tocante di e trainingnan cu IDEA ta ofrece y sra. Sharon van der Linden, Funcionario di Maneho na Exprodesk ta elabora riba e cursonan cu Exprodesk ta ofrece durante henter aña.
Sintonisa TeleAruba dialuna 14 di december pa 7.10 di anochi pa ta bon informa tocante tur e trabounan cu DEZHI ta eherce pa reactiva economia di Pais Aruba.
