Compania di transporte maritimo King Ocean a anuncia cu e bunker surcharge riba carga entre puertonan di Merca y Aruba, Boneiro y Corsou lo subi considerablemente entrante 12 di april 2026. E compania a indica cu e nivel final di e tarifa lo wordo confirma riba 9 di april, dependiendo di movemento di mercado di fuel.
Segun King Ocean lo monitoria nivelnan di bunker fuel diariamente pa sigui desaroyo di mercado. Riba base di e dato real di mercado, e compania lo revisa y confirma e tarifa definitivo prome cu e fecha di implementacion.
E anuncio ta indica cu bunker surcharge riba diferente tipo di carga lo aumenta de forma notabel. Por ehempel, pa un contenedor seco di 40 pia (40’ dry container) e tarifa lo subi di $400 pa $1,400, loke representa un aumento di aproximadamente 250% den bunker surcharge.
Sinembargo, segun analisis di sector logistico, e cambio aki no necesariamente ta nifica cu e flete completo lo subi cu 300%, manera cu algun informacion ta circulando. Den practica, e impacto riba costo total di transporte pa un contenedor di 40 pia ta rond di 25,4% di aumento den flete total.
Otro categoria di carga tambe lo mira un aumento, incluyendo contenedornan refrigera (reefer), vehiculonan y carga breakbulk.
Preocupacion riba impacto pa importacion
E subida di bunker surcharge ta crea preocupacion den sector di importacion na Aruba, pasobra costo di transporte ta forma un parti importante di prijs final di producto cu ta drenta Aruba.
Tin voznan den sector cu ta sugeri cu Gobierno por considera ahuste fiscal temporal, manera reduccion di invoerrechten of BBO, pa compensa parcialmente e aumento di costo logistico pa importadornan y consumidornan.
Tambe ta surgi discusion riba e forma cu Aruba ta calcula invoerrechten basa riba CIF-waarde (Cost, Insurance and Freight). Esaki ta nifica cu impuesto ta wordo calcula no solamente riba balor di producto, pero tambe riba costo di seguro y transporte. Segun e criticanan ta argumenta cu e sistema aki ta aumenta costo di importacion innecesariamente.
Aruba, Boneiru y Corsou ta depende fuertemente riba importacion di mercancia, principalmente for di Merca. Pa e motibo ey, cualkier cambio den costo di transporte maritimo por tin impacto directo riba prijs di producto den mercado local.