Celebrando Dia di Prensa na Aruba

Mundialmente e trabou di prensa ta wordo reconoci como un trabou cu tin un rol hopi importante den un sociedad. Aunke e manera cu nos ta lesa nos noticia a cambia hopi durante e añanan, locual cu no a cambia ta e importancia di tin libertad di prensa y e derecho di tin accesibilidad na un prensa neutral cu ta enfoca riba educa, informa y entretene e comunidad. E no ta un trabou facil y awe, riba 1 di september nos ta dedica un tiki tempo na celebra nos prensa local, riba Dia di Prensa.

Na Aruba, e celebracion di Dia di Prensa ta relativamente hoben. Segun documentacion di nos historia, e prome noticiero di Aruba a wordo publica na aña 1935. Na aña 1948, prensa mundial a wordo reconoci y celebra pa prome biaha pero, esaki no a bin sin e trabou duro di algun periodista. Sin duda, hopi lo puntra nan mes, kico ta e importancia di prensa? Y e contesta pa e pregunta aki ta facil, un prensa liber ta un forma crucial pa midi e salud di un sociedad democratico. Pero entre e atakenan riba periodista y sensacionnan manera ‘fake news’, e trabou di prensa, e ‘watch dog’ di nos sociedad, no ta wordo tuma cu mesun seriedad manera antes mas.

Reflehando riba e trabou y e impacto cu prensa ta haci riba un nivel internacional, nos ta comparti algun datos tocante e situacion di periodistanan rond di mundo:
– Cada aña e cifra di periodistanan cu ta perde nan bida ta bira mas halto. Desde 1992, un total di 1,340 periodista a perde nan bida sea cubriendo un topico den un area peligroso of pa motibo di asesinato.
– E cantidad di periodista cu ta encarcela actualmente ta historicamente halto. E ultimo añanan nos por a observa cu mas cu 250 periodista ta wordo encarcela tur aña, y mas cu mitar di e cifra aki ta encarcelacionnan cu a sosode na Turkia, China, Egypte.
– Menos cu un kwart di e mundo ta wordo considera un bon lugar pa media. Segun e rapport di World Press Freedom Index di Reporters Without Borders (RWB) e estado di periodismo den mas di tres kwart di e 180 paisnan cu a wordo investiga, ta problematico, dificil of hopi serio. Solamente 24% di e paisnan ta wordo clasifica bon of bastante bon pa media.
– Periodistanan ta enfrenta miedo y peligro den un scala cu nunca a wordo observa. Segun RWB, e paisnan unda medionan di comunicacion por eherce nan trabou cu siguridad, sin miedo y sin violencia ta birando cada bez menos.
– Scandinavia ta e pais cu mas libertad di prensa.
– Algun cambio a cuminsa tuma lugar. Mas cu 100 paso a cuminsa adopta leynan di libertad pa informacion, dunando e publico acceso na conocemento cu gobierno y instancianan politico tin.

Mescos cu paisnan grandi, na Aruba nos tambe por a conta cu pioneronan den e profesion di periodismo, manera Jos van der Schoot, Toko Winklaar, Anthony Carlo y Djiespi Franken. Durante e añanan e caranan a cambia hopi, pero e esencia di nos prensa local semper a keda autentico na nos comunidad Arubano. Pesey, riba un dia manera awe, nos ta celebra e libertad cu prensa di Aruba tin pa por eherce su trabou sin peliger, y retonan extraordinario. Nos ta aplaudi e tempo cu periodistanan ta sacrifica pa nan por investiga, elabora y entrega noticia cu informacion confiabel. Danki na nos prensa local, nos por conta cu un comunidad bon informa, y esaki ta apoya bon gobernacion.

Felis Dia di Prensa!