Un funcionario di DIP aña pasa a wordo manda cas pa haci investigacion. Sinembargo lunanan a pasa y no tin nada contra dje y no ta permitie bay traha. Finalmente den e caso cu el a entabla den Corte, Hues a bisa cu e ta duna Gobierno tres siman, despues di e sentencia pa laga e funcionario cuminsa traha.
GW a haya un documento di Gobierno na october, 2020, cu ta bisa cu e ta geschors “te dia cu autoridad concerni tuma un decision riba su castigo disciplinario”.
Dia 3 di november 2020 e ambtenaar aki a dicidi entrega un obhecion, pa cual dia 8 di april a entrega algun documento. Corte mes a trata e caso dia 12 di april. E ambtenaar aki ta ocupa un funcion halto na Directie Infrastructuur en Planning (DIP). Dia 24 di juli director interino a dicidi cu ta dun’e un prohibicion inmediato pa drenta areanan di DIP pa seis siman largo. E carta cu e director interino a skirbi ta menciona cu esaki ta necesario pa por haci un investigacion sin problema relaciona cu tres caso di opcion/otorgamento di terenonan comercial cu no a bay segun e procedura normal. Esaki, segun e director a bisa e tempo ey, ta motibo pa un investigacion interno.
A informe cu e prohibicion ta pa seis siman, y cu por wordo prolonga cu otro seis siman. Dia 4 di september a prolonga esaki cu seis siman. Dia 7 di october, 2020, a informe cu a schors’e di su funcion te ora cu autoridad conerni tuma un decision riba su castigo disciplinario.
E ambtenaar ta nenga di a comete algo contra ley of loke nan ta acus’e di a haci, no tin hechonan concreto ni circunstancianan pa señal’e.
Corte a bisa cu Gobierno tin e autoridad den ley pa tuma un ordemaatregel pa haci cierto investigacion. Pues no a actua contra ley. Den e decreto gubernamental di prohibicion su entrada a splica di forma concreto e sospecho cu tin contra e ambtenaar, cu ta no a sigui e procedura normal pa loke ta otorgamento di terenonan comercial. Pues tabatin base pa tuma e ordemaatregel. Pero Hues a bisa tambe cu den e caso aki, e no ta duna su opinion si e sospecho en cuestion ta na su luga of no. Esey no ta forma parti di e caso of e procedura aki.
Pero si Hues a bisa cu en principio e schorsing no por dura mas cu loke ta necesario. Doño di trabou mester actua di un forma diligente pa loke ta e investigacion disciplinario. . Durante tratamento di e caso a bisa cu e investigacion di Forensics no tabata cla ainda y cu nan no por bisa cuanto tempo mas e lo por dura. Despues a tende cu Forensics ta en espera di e di dos declaracion di e ambtenaar. Depende di esaki lo por bisa si tin mas pregunta. Y cu nan no ta mira cu e regreso di e ambtenaar na trabou lo influencia e preguntanan ey.
Mirando e splicacion aki, Corte ta bisa cu no tin motibo pa mantene schorsing di e empleado aki. Ademas, e consecuencianan cu si e keda sin traha ta pisa pa e ambtenaar.Pesey esaki por dura solamente te tres siman despues di e sentencia, cual tabata dia 21 di juni ultimo. Pues mientrastanto, e ambtenaar mester a bay traha caba.
Corte: Schorsing di un ambtenaar no por dura mas largo cu ta necesario
