Tourism Corporation Bonaire (TCB) a anunsiá su sifranan
preliminar pa luna di mei 2024, for di kua ta resultá ku den e luna ei Boneiru a yama bon
biní na 13.333 bishitante stayover. Esaki ta nifiká un oumento di 4% kompará ku luna di
mei 2023. Den e mesun luna aña pasá Boneiru a yama bon biní na 12.631 bishitante
stayover. Si nos bai kompará ku e prestashonnan di promé ku e pandemia, e ora ei nos ta
mira ku den luna di mei 2019 por ehèmpel, Boneiru a yama bon biní na en total 12.000
bishitante. E kresementu akí ta nifiká un tendensia positivo den Boneiru su trayekto
turístiko.
E kantidat di bishitante den aña 2024 a subi ku mas òf ménos 4% kompará ku aña 2023 i
ku mas òf ménos 9,4% kompará ku aña 2019.
E bishitantenan hulandes a keda e grupo di mas grandi ku 47% di e total, siguí pa e
merikanonan ku 20%. Banda di esaki bishitantenan for di Kòrsou a representá 18% di nos
bishitantenan. Canada, Alemania i Aruba tambe a aportá konsiderabelmente na Boneiru
su sektor turístiko.
E bishitantenan merikano a bini prinsipalmente for di New York, Florida, Massachusetts,
California, Colorado i otro estadonan grandi. E gruponan di edat ku representashon mas
grandi tabata esun di 55 pa 64 aña (25%) i esun di 45 pa 54 aña (17%), loke ta un indikashon
di un interes fuerte serka biaheronan di edat medio. E bishitantenan hulandes a bini
prinsipalmente for di Noord-Holland, Zuid-Holland iNoord-Brabant, kaminda e gruponan
di edat di 45 pa 54 aña (18%) i di 55 pa 64 aña a dominá.
Mas aleu den luna di mart 2024 Boneiru a yama bon biní na 43.567 bishitante krusero riba
en total 21 barku krusero i den luna di aprel 2024 tabatin 34.679 bishitante krusero riba
en total 14 barku.
Pa estadístika i informashon mas detayá tokante e prestashonnan turístiko di Boneiru,
bo por bishitá nos wèpsait ofisial riba www.bonaireisland.com òf bo por tuma kontakto
ku nos via email riba info@bonaireisland.com.
Den luna di mei 2024 Boneiru a yama bon biní na 13.333 bishitante stayover
