ACE Foundation ta contento despues cu e proyecto Career finansia pa Fonds
Podiumkunsten a cera cu un total di 12 hoben cu tin interes pa bira cantante. Despues cu siman
pasa ACE Foundation a anuncia cu e organisacion ta busca hobennan cu tin talento di canta y
cu comberti nan pasion den nan profesion, e reaccion tabata di inmediato.
“ACE ta contento cu e reaccion positivo y e la surpasa nos expectativanan. Nos tabata busca 5 cantante y awor nos a haña 12”. Diasabra y dialuna tras di lomba na Creative World tabata momento cu e tur
esunnan cu a inscribi a haña oportunidad di demostra nan talento. E no tabata un competencia
pero mas un momento pa wak kico cada cantante tin aden. Mester bisa cu cada un di e
hobennan entre 18 pa 33 aña cu presenta tin potencial pa logra bira un cantante. Tin tabata
hopi nervioso pa motibo cu ta prome biaha cu nan mester a presenta dilanti di un grupo di hende
riba escenario. Pero tambe tabata tin esunnan cu tin un tiki experencia pero lo ke logra mas den
farandula.
Despues di e audision awor ta bay sigui un trayecto di formacion y preparacion.
Durante di e trayecto cu ta sigui e cantantenan aspirante lo bay haña preparacion den canto,
composicion, grabacion, vestuario artistico, preparacion mental, presentacion, maneho y
mercado y mas. Practicamente tur aspecto pa nan por compronde e carera artistico di un
cantante y duna nan tur e herment nan necesario pa nan por cana e caminda y logra exito.
Dialuna nan a cuminsa haña nan primo preparacionnan cerca e legendario artista Xemio
Jacobs cu ta bay guianan cu tecnica di cantamento y tambe yuda nan compone nan propio
cancion. E intencion ta cu denter di un luna nan mester ta cla cu nan cancion y den luna di
maart nan lo graba nan video clip bou di direccion di Xechel Jacobs miho conoci como
“Bauco”. Lo bay tin varios profesional mas cu lo bay yuda guia e hobennan aki. Director di ACE,
Marlies Vels a bisa cu ACE lo bay haci tur esfuerso pa maske ta 5 hoben por cana e trayecto pa
toch logra pa yuda mas hoben. Nos lo ke yuda tur pero nos tin fondo pa haci cinco. Nos lo bay
acerca sponsornan pa asina nos por soru pa tur e hobennan por saka full nan potenshal. Pronto
nos lo bai laga sa ken e hoben cantante prospectonan pa Boneiro ta.