Tin momentonan den historia politico di Aruba, unda silencio ta bira complicidad. Pa fraccion di PPA, e declaracion reciente di staatssecretaris Eric van der Burg na Hulanda ta precisamente un di e momentonan ey. Segun parlamentario Eduard Pieters, e declaracion no solamente a confirma cu Rijkswet HOFA ta sigui avansa den Reino Hulandes, pero tambe a revela algo hopi mas grave: cu gobierno di Aruba a permiti un proceso sin consenso democratico, sin sosten amplio y posibelmente pafor di e cuadro constitucional.
Cua consenso?
Segun Van der Burg, tin consenso pasobra minister plenipotenciario Schwengle a presenta e Rijkswet HOFA den Rijksministerraad y eyden nan a yega na un consenso pa e proceso por sigui pa Raad van Staten. Pero pa PPA, e declaracion aki ta un choke frontal cu realidad politico y constitucional di Aruba.
“Cua consenso?” Pieters ta puntra. “Ningun momento Parlamento di Aruba a aproba Rijkswet HOFA ni a duna instruccion formal na gobierno pa manda e ley aki pa Rijksministerraad, cu ta impugna cu palabracionnan haci den IPKO na 2022.”
Segun Pieters, esaki ta e punto central cu gobierno ta evitando. Parlamento, como representante directo di pueblo, nunca a vota ni aproba e proceso. Sin e stap democratico ey, PPA ta argumenta cu no tin legitimidad constitucional y sosten amplio pa bisa cu Aruba a duna consenso.
Raad van Advies a yama e proceso aki uno preocupante
Pieters a pone enfasis riba e conseho devastador di Raad van Advies, cu a critica fuertemente e manera cu gobierno a maneha e proceso. Segun Raad van Advies, gobierno no a warda pa e instituto constitucional ey duna conseho y a manda e ley pa Rijksministerraad sin conseho previo.
Pero e critica mas fuerte tabata riba e principio di “Nemo-plus-beginsel”, unda Raad van Advies a indica cu un minister tin autoridad defini den Constitucion, pero no por crea autoridad adicional pa su mes fuera di e cuadro constitucional y aplica condicionnan mara na un ley.
“Pues kico nos ta mira awe?” Pieters a cuestiona. “Un gobierno cu ta bypass Parlamento, bypass Raad van Advies y tuma poder cu no ta ancra den nos Constitucion.”
Pueblo ya a bisa no
Pa PPA, e declaracion di Van der Burg ta crea un percepcion falso cu Aruba ya a acepta HOFA. Pero Pieters ta enfatisa cu realidad social y politico ta exactamente contrario.
“Tin mas di 10 mil firma contra Rijkswet HOFA. Tin 13 sindicato cu a declara publicamente cu e ley aki ta contra nos Constitucion. Nos tin un pueblo cu claramente no ta di acuerdo.” Segun Pieters, e resistencia contra HOFA a pasa color politico caba. “Tin hende di tur partido politico cu ta acerca PPA pa bisa claramente cu nan no kier Aruba entrega su autonomia.”
Status Aparte no ta negociabel
Un di e puntonan cu mas a preocupa PPA tabata e declaracion di Van der Burg cu via HOFA, e paisnan dentro di Reino porfin lo keda “igual”. Pa Pieters, esaki ta un menaza directo na Status Aparte di Aruba.
“For di 1940 nos pueblo a lucha pa mas autonomia y na 1986 Aruba a logra Status Aparte y bira un pais den Reino Hulandes banda di Antiya y Hulanda. Awor no por bin cambia esey via un rijkswet, sin sigui e proceduranan cu nos Statuto y Constitucion ta exigi.”
Pieters a recorda cu articulo 55 di Statuto ta exigi un proceso hopi mas rigoroso pa cambia posicion constitucional di Aruba, incluyendo dos lectura parlamentario y un mayoria di dos tercera parti pa aproba e cambio. “No ta algo cu por pasa scondi den un oficina na Den Haag,” el a declara.
E pueblo lo tuma posicion
Den su mensahe final, Pieters a lansa un advertencia politico fuerte tanto na gobierno di Aruba como na Reino Hulandes. “Nos no ta papia di un ley financiero solamente. Nos ta papia di autonomia, di democracia y di respet pa nos Constitucion.”
Segun PPA, si gobierno y Parlamento sigui ignora e preocupacionnan constitucional y social rond di HOFA, pueblo mes lo tuma su posicion. “Historia di Aruba a mustra un cos cla,” Pieters a conclui. “Ora e lidernan no proteha pais, pueblo ta haci esey nan mes.”
Eduard Pieters (PPA): “Ora e lidernan no proteha pais, pueblo ta haci esey nan mes”
