Riba dia 9 di augustus 2025 lo corona e Aruba Caiso Monarch 2025 durante e Calypso Showdown presenta pa Stichting Musica
Stichting Musica ta trahando incansablemente pa presenta e prome edicion di “Calypso Showdown”. Durante e festival y contest aki, cu lo tuma lugar riba dia 9 di augustus 2025 na Kulture Café San Nicolas, pueblo di Aruba lo cera conoci cu e Aruba Caiso Monarch 2025. Esaki lo por bira un Caiso King of Caiso Queen, cu lo gana e suma impresionante di Awg. 10.000,- como premio maximo. Fuera di esaki lo tin premio pa e compositor y areglista ganador y tambe premionan di incentiva, manera e.o. e premio pa Best Show y Best Costume.
E Calypsonians cu ta participando na e Calypso Showdown ta den pleno preparacion, pa asina presenta nan cantica den un forma potente, cu atencion pa tur detaye, cu letranan fuerte y un bon show pa fortalece e mensahe cu nan kier trece dilanti den nan cancion.
Despues di algun reunion, recientemente e ensayonan pa e Calypso Showdown di dia 9 di augustus a cuminsa na Poets Music Studio. E training a bai den forma ameno, na unda cu e Calypsonians a laga e musiconan di e All Star Band, dirigi pa Dwight Leoneta, completamente asombra. E calidad y nivel lo ta hopi halto pa e Calypso Showdown, pues e ta priminti di bira un evento historico cu un balor grandi pa nos herencia cultural.
Stichting Musica, e Calypsonians y All Star Band ta invita henter pueblo di Aruba pa bin disfruta di nan show y tambe di e Guest Stars cu lo ta presente durante di e anochi. Fuera di esaki lo tin un momento special pa entrega e Lifetime Achievement Award na Claudius “Mighty Talent” Philips. Stichting Musica a indica cu: “no tin ningun motibo pa keda cas riba e anochi aki”.
Calypso Showdown ta un presentacion di Stichting Musica, conhuntamente cu Setar NV y cu aporte di Brouwerij Balashi y Elite Productions & Entertainment. Tickets pa entrada ta disponibel na CITGO Boulevard y CITGO Essoville, Tambe ta posibel pa cumpra ticket via Pay.AW. Tickets ta costa 35 florin pa cada persona. Tur hende lo ta VIP riba e anochi di Calypso Showdown, cu mesa y stoel pa sinta. Pa reserva un mesa (pa 10 persona), por tuma contacto via Whatsapp na 566-1819.
