Forma parti di e proyecto inovativo di Wikipedia cu e meta pa inspira, educa y envolve comunidad di Aruba
pa crea y comparti conocemento riba Wikipedia.
Diaranson 13 di Februari 2025, Wikipedia riba Aruba lo lansa oficialmente cu un evento di apertura na
Biblioteca Nacional Aruba.
E proyecto aki, cu ta dura 18 luna, tin como meta pa educa e comunidad local riba e poder di Wikipedia,
forma un comunidad activo pa comparti conocemento, y mustra e herencia rico di Aruba riba un plataforma
global.
Wikipedia Riba Aruba ta organisa door di Wikimedia Nederland den colaboracion cu Archivo Nacional
Aruba, Biblioteca Nacional Aruba, Stichting Monumentenfonds and Union di Organisacionnan Cultural
Arubano. E fondo pa e projecto a wordo facilita door di Fonds Cultuurparticipatie.
Bou maneho di Wikimedian in Residence Ginelly Quandt, Project Lead Michelle van Lanschot y Project
Coordinator Ricardo Arends, e iniciativa aki lo trece oportunidad na esnan interesa pa contribui
conocemento na Papiamento, y asina garantisa accesibilidad y representacion mas amplio di e cultura y
historia di Aruba.
Informacion di Evento di Apertura
Fecha: Diaranson, 13 di Februari 2025
Lugar: Biblioteca Nacional Aruba
Ora: 6:00 PM – 8:00 PM
Durante e evento lo presenta tocante e proyecto, lo tiene un dialogo interactivo y duna informacion riba con
comunidad por participa of ta envolvi. Participantenan lo por siña con Wikipedia ta traha, e proceso di
credibilidad y verificacion, y con nan por contribui cu articulo den Papiamento of añadi imagenan di uso liber
na Wikimedia Commons.
Tocante Wikipedia riba Aruba
E proyecto di Wikipedia riba Aruba ta dedica pa hasi conocimiento tocante Aruba accesibel pa mundo
henter. E ta enfoca riba:
Educa tocante e importancia di Wikipedia pa preserva y promove e herencia di Aruba.
Inspira hende pa skirbi y documenta e historia y informacion rico di Aruba den nos idioma nativo riba
Wikipedia, creando un impacto duradero.
Forma un comunidad di contribuyente apasiona cu lo skirbi y comparti conocemento den Papiamento.
Subi imagenan y contenido liber tocante e cultura, lugarnan emblematico y historia di Aruba.
Traha hunto cu organisacionnan di herencia cultural pa pone nan conocemento y coleccionnan disponible
riba plataforma di Wikimedia.
Dicon Esaki Ta Importante?
Aruba tin un herencia cultural rico cu merece wordo reconoci globalmente. Sinembargo, hopi di su historia,
tradicion y conocemento ainda no ta representa na plataforma digital accesibel manera Wikipedia. Door di
duna poder na nos comunidad local pa contribui den Wikipedia na Papiamento, e iniciativa aki ta garantisa
cu e historia di Aruba ta wordo conta den un manera autentico y ta keda accesibel pa futuro generacion nan.
Un Invitacion pa Tur
Nos ta invita e comunidad di Aruba pa asisti na nos evento di apertura y tuma parti di e movecion
emocionante aki. Si bo ta apasiona tocante herencia di Aruba, interesa pa contribui conocemento, of
simplemente ta curioso pa siña mas—e proyecto aki ta pa bo!