Fraccion di PPA ta aplaudi y duna sosten total pa e iniciativa di reconocemento “Hala di Shoco” lansa recientemente pa e Presidente di Parlamento. E premiacion innovador ta habri e posibilidad pa e scol- y organisacionnan nomina hoben entre 15 pa 24 aña, cu ta sobresali den comunidad door di nan logronan, dedicacion y liderasgo y cu por sirbi como ehempel pa su generacion.
Casi 40 aña di Status Aparte
E iniciativa di reconocemento “Hala di Shoco” ta bin den un momento significativo: casi 40 aña despues di Status Aparte, un momento unico den nos historia nacional, cu a duna Aruba su autonomia politico. Esaki sigur ta un momento oportuno pa reflexiona, no solamente riba e logronan, pero tambe riba e deficiencianan di nos institucionnan, specialmente Parlamento. Ta ora pa evalua si nos sistema democratico ta cumpli cu e meta original: un parlamento cu ta sirbi pueblo cu integridad, transparencia y responsabilidad.
Un comunidad cu hopi talento hoben
No tin duda cu den nos comunidad tin hopi talento, hopi inspiracion y hopi motibo pa duna reconocemento na nos hobennan. Parlamento como e organo di mas halto na Aruba sigur mester por tuma e paso importante aki, pa stimula participacion civico, desaroyo personal y di liderazgo pa futuro. PPA sinceramente ta reconoce cu e tipo di plataforma aki por brinda un bos y visibilidad na e heroenan hoben di comunidad, cu biaha ta keda den sombra.
Parlamento mester duna ehempel
Ta un contradiccion enorme cu e institucion di mas halto na Aruba, cu ta premia nos “rol modelnan”, no ta actua consistentemente como un rol model mes. Den un sistema democratico y constitucional manera nos, ta esencial pa Parlamento mes cumpli cu su rol segun e Staatsregeling y Reglement van Orde. Cu esaki den mente, PPA ta pone enfasis riba productividad di e personal di Parlamento, cu tambe mester por tin un mecanismo di evaluacon, pa garantisa cu recurso humano y financiero ta uza efectivamente.
Awendia nos ta mira cu ministernan ta tuma e decisionnan sin Landsbesluit, tin falta di transparencia den proceso parlamentario y un falta casi structural di control y evaluacion interno di parti di e miembronan di Parlamento di coalicion. Y pa completa, ta preocupante cu no ta existi ni sikiera un mecanismo continuo pa evalua, si Parlamento mes ta cumpli cu e rolnan constitucional y normativo cu e pueblo a confia na nos.
Comision Excepcional pa Autocontrol y Transparencia
PPA ta propone pa crea un Comision Excepcional den seno di Parlamento, cu un representante for di cada fraccion, pa vigila y evalua e funcionamento di Parlamento mes. E comision aki por monitoria si e proceso legislativo ta sigui e reglanan, si realmente ta eherce e rolnan di control y si e parlamentarionan y e fraccionnan ta sirbi pueblo na un manera responsabel, husto, transparente y proactivo. Esaki lo ta un gran paso pa eleva integridad y funcionamento democratico.
Pregunta crucial pa futuro di nos democracia
Mirando padilanti, PPA tin varios pregunta urgente cu mester haya contesta:
• Dicon no tin un evaluacion di e funcionamento real di Parlamento y su miembronan?
• Unda e mecanismo pa exigi responsabilidad a keda?
• Con por fortalece e capacidad tecnico y etico di nos parlamentarionan?
• Con por midi eficiencia di personal y Miembro di Parlamento? Ta realmente cumpli cu loke ta spera di nan?
Sin evaluacion real y sin compromiso pa mehoracion continuo, Parlamento no lo logra gana e confiansa bek di su pueblo, specialmente di su hobennan. Nos autonomia y nos democracia ta poni na prueba!
Si Parlamento kier ta stimula nos hubentud pa bira lider positivo, nos como adulto y representante tambe mester duna e mesun ehempel. Tin hopi espacio pa henter e organo Parlamentario mehora y e momento ta awor cu e premio di ‘Hala di Shoco’.
PPA ta pidi pa nos no limita nos rol na premiacion simbolico so, sino pa nos compromete cu un Parlamento cu ta eleva su nivel y ta pone un standaard real pa liderasgo riba e isla.