“Derechonan di mucha no mester keda solamente riba papel, nan mester bira
realidad den bida di cada mucha.”
Na ocasion di Dia Internacional di Mucha, ami, Ruthlyn Lindor, parlamentaria di FUTURO
y Vicepresidente di Parlamento di Aruba, kier reafirma mi compromiso pa un Aruba unda
cada mucha por crece den siguridad, dignidad, amor y cu oportunidad igual.
Como parlamentaria, criminologa y mama, mi ta kere firmemente cu proteccion di nos
muchanan no ta solamente un responsabilidad di famia, sino un deber di Estado y di nos
sociedad completo.
E conviccion aki ta forma e base di mi trabou parlamentario, caminda mi ta sigui
compromete mi mes pa fortalece educacion, crea un base legal sostenibel pa
programanan di afterschool, proteha nos atletanan menor di edad, promove salud mental,
preveni delincuencia hubenil y garantisa cu ningun mucha keda atras.
Mi ta kere cu prevencion ta cuminsa hopi prome cu un mucha yega den sistema di
husticia. E ta cuminsa ora nos duna un mucha atencion, oportunidad, guia y un ambiente
safe y sigur pa crece.
Pa mi, inversion den nos muchanan no ta un gasto, sino un inversion den futuro di Aruba.
Un inversion den un sociedad mas husto, sigur y inclusivo, conforme cu e Convencion
Internacional di Derechonan di Mucha y e Obhetivonan di Desaroyo Sostenibel.
Mi ta convenci cu un mucha no mester lucha pa haya su derechonan respeta. Ta nos,
como adultonan, como lideranan y como sociedad tin e responsabilidad di lucha pa
garantisa e derechonan di tur mucha.
Pasobra e futuro di Aruba no ta cuminsa mañan. E ta crece den nos muchanan awe.
Felis Dia Internacional di Mucha!
Ruthlyn V. Lindor, MSc., MBA
