Como parti di acuerdo strategico cu Colegio EPI: Un inversion den nos talento
Aruba Tourism Authority (A.T.A.) ta continua su compromiso pa fortifica sector culinario di Aruba pa medio
di e Culinary Education Plan, un plan educativo desaroya den colaboracion cu scolnan local manera
Stichting EPB y Colegio EPI. E plan ta enfoca riba inspira talento hoben, yuda desaroya e comunidad
laboral y na mes momento contribui na sostenibilidad y calidad di e industria culinario di Aruba, un pilar
importante den e producto turistico di Aruba.
Turismo culinario ta hunga un rol esencial den experiencia di Aruba como destinacion. E cultura,
diversidad y creatividad di nos cushina local ta forma parti integral di con Aruba ta presenta su identidad
na mundo. Pa e motibo aki, A.T.A. ta inverti den educacion culinario, no solamente pa apoya e desaroyo
profesional di studiantenan, pero tambe pa sigura un futuro fuerte y innovativo pa e sector di hospitalidad y
turismo. E Culinary Education Plan ta inclui varios iniciativa cu ta conecta educacion cu experiencia real di
e industria y cu ta duna studiantenan experiencia cu ta prepara nan pa un carera exitoso.
Diadomingo 10 di mei, a inicia e biahe culinario internacional. E ekipo di A.T.A. hunto cu maestronan y
cinco studiante cu a sobresali durante nan trayectorio na Colegio EPI den e unidad di Hospitalidad y
Turismo, cu specialisacion den e sector di Horeca, a sali rumbo pa Lima, Peru. E studiantenan cu ta
participando na e experiencia internacional aki ta Dylan Alvarez, Giovanni Oduber, Kaemon Winter,
Taylisha Leest y Isabelle Baluyot. Durante e biahe, e studiantenan lo haya e oportunidad pa explora e
cushina tradicional di Peru, nan lo siña tecnicanan culinario, bishita un institucion educacional culinario pa
amplia nan conocemento tocante e sistema di enseñansa gastronomico na Peru, pa asina siña conoce y
haya inspiracion for di e cultura gastronomico y influencia internacional cu ta forma e identidad culinario
unico di Peru. Durante salida di e grupo na Aeropuerto Internacional Reina Beatrix, e CEO di A.T.A., Ronella Croes, a
expresa su apoyo na e iniciativa bisando: “Pa A.T.A., iniciativanan manera e biahe culinario internacional
ta esencial. Nos ta inverti den hubentud y talento local cu ta e proximo generacion di profesionalnan cu lo
forma e futuro di turismo di Aruba. E conocemento y inspiracion cu e studiantenan lo trece bek pa Aruba ta
contribui na crecemento continuo di nos sector culinario, pero tambe bienestar di nos comunidad.”
E proposito di e biahe ta pa amplia nan perspectiva professional, inspira nan pa sobresali den nan ofishi y
permiti nan siña directamente for di un ambiente culinario internacional a traves di experienciannan
practico y inmersivo. Nos ta desea nan tur clase di exito riba nan biahe educacional.
