Mientrastanto cu Aruba ta asercando e fecha crucial di prome di juni pa e anuncio di e maneho nobo di ‘vacation rentals’, e representantenan di e sector ta boga pa uza tecnologia moderno y data real pa structura e ley. Basa riba investigacion profundo di modelonan internacional exitoso y data concreto di e mercado local, e sector ta pidi un regulacion inteligente cu ta facilita cumplimento (compliance), controla e inversion estranhero den barionan residencial, y proteha e habitante local.
Un di e puntonan di mas grandi den e discusion nacional aki ta con Gobierno ta bay controla y cuandra un sector cu a crece structuralmente den e ultimo añanan. Pa e operadornan cu tin e experticio y experencia, e contesta no ta sinta den burocracia complica, sino den inovacion digital.
E ehempel di Breckenridge: Tecnologia pa un cumplimento di 90%
Basa riba un investigacion extenso (research) di e modelonan legal rond mundo, representantenan di e sector ta subraya cu Aruba por siña hopi for di ciudadnan turistico na Merca cu tin e mesun caracteristica- y grandura di nos isla. Un ehempel concreto ta Breckenridge, Colorado, un destino mescos cu Aruba ta 100% dependiente di turismo.
Breckenridge tin un mercado di rond di 4,000 ‘vacation rentals’ (un cifra masha similar na e realidad di Aruba). Sinembargo, e forma con nan ta maneha esaki ta un ehempel di eficiencia:
Centralisacion Digital: Nan ta uza softwares avansa cu ta saca afor con pa registra e propiedadnan y con pa conecta esaki cu e diferente plataformanan (manera Airbnb of Booking.com) pa asina tin tur informacion legal den un solo luga.
Personal Minimo y Eficiente: Cu e uzo di e tecnologia aki, e departamento encarga tin apenas tres o cuater trahador so pa colecta e datonan y fondonan.
Cumplimento Halto: E ciudad tin un tasa di cumplimento (compliance rate) di riba 90%.
“Aworaki nos no sa kico e compliance rate ta na Aruba. Mi ta sinti cu e la crece, pasobra mas y mas hende, door di tur loke ta wordo papia riba caya, tin miedo di no ta compliant y nan ta cuminsa registra y paga nan fair share. Pero nos sa cu e no ta cerca di 90%,” un experto di e sector a declara, alertando tambe cu e regulacion lo mester deal cu un backtrack di hopi hende cu tabata huur den anonimato den pasado.
Ademas, e sector ta enfatisa cu e regulacion no mester mira solamente e parti di belasting, sino tambe stipula un control di calidad pa garantisa cu e propiedadnan ta na un nivel halto caminda e turista por sinti su mes confortabel y na agrado, protegiendo e nomber di e destino.
Mita di e doñonan ta local: Rompiendo speculacionnan cu data real
Un di e mitonan mas grandi cu tin riba caya ta cu e industria di ‘vacation rental’ ta den man di inversionistanan extrhero so. Sinembargo, e datonan structural di e industria mes ta mustra un panorama hopi mas balansa.
E compania di property management “Vacation rental Aruba”, un di e lidernan den e sector cu ta maneha un portfolio di rond di 400 cas, a comparti datonan clave cu ta duna un bista real di e mercado:
Tipo di Propiedad y Ubicacion
Realidad di e Doñonan
Inclui propiedadnan den proyectonan grandi manera Gold Coast, Oceanía, Palma Aruba y Tierra del Sol (zonanan destina structuralmente pa benta na publico internacional).
Mas cu mita (50%+) di tur e doñonan cu e compania ta maneha ta local (Arubiano).
E data aki ta confirma cu e speculacion cu e doñonan ta mayoritariamente estranhero no ta cuadra cu e realidad cu e operadornan ta mira day in, day out. Ademas, a wordo aclara cu hopi local cu tin un apartamento den cura no ta uza companianan di property management pa evita paga comision; nan mes ta haci e trabou di limpieza, mantencion y duna e servicio. Esaki ta nifica cu e cantidad di localnan cu ta biba directamente di e industria aki ta structuralmente hopi mas halto pa e isla.
Control husto pa proteha barionan residencial
Aunke e sector ta defende e participacion local, e expertonan ta di acuerdo cu mester bin un control selectivo pa e inversionnan di afo. E meta mester ta pa busca un balans pa no perhudica e localnan cu ya caba ta den e industria, pero si frena e saturacion.
“Mester tin un control pa stranheronan no cumpra na luganan cu a wordo destina pa residencianan pa local. Esey ta sigur,” Alex Cybul propetario di vacations Rentals a duna di conoce.
E sector ta pidi pa e maneho cu Gobierno lo presenta no wordo diseña for di un oficina so, sino cu e wordo guia pa e experencia, e investigacionnan internacional y e data real di e mercado cu e operadornan tin pa ofrece, garantisando asina un ley cu berdad ta husto y structural pa Aruba.