Diadomingo 23 di augustus, Dia Internacional pa Recuerdo di Comercio di Catibo y su Abolicion, e exposicion renova ‘NOS: Caminda Pasado y Presente ta topa’ a habri simultaneamente na Aruba, Boneiro y Corsou.
Cu e exposicion renova aki, Comite di Conmemoracion Pasado di Sclavitud ta trece e historianan di hendenan cu a resisti sclavitud y oprecion riba e seis islanan den parti Caribense di Reino mas prominente den spotlight. Na un fecha mas despues, e exposicion renova lo habri tambe na Sint Maarten, Saba y Sint Eustatius.
E renobacion di ‘NOS: Caminda Pasado y Presente ta topa’ ta pone un enfasis mas fuerte riba resistencia: e hendenan cu, hopi prome cu sclavitud a wordo aboli formalmente, a reclama nan libertad, dignidad y humanidad na varios manera. Haciendo esaki, e exposicion ta conta e historia di e historia di sclavitud no solamente for di e perspectiva di oprecion y falta di libertad, pero hustamente for di e perspectiva di resistencia, curashi y e lucha continuo pa libertad.
Historianan di resistencia di e seis islanan
Den e exposicion renova ta destaca varios heroe di resistencia di historia di e islanan. Entre nan ta The Saba 14, Maria, Flora, Tula, Thico, Martis di Catalina Janga, One-Tete Lokhay y Thomas Dupersoy.
A duna atencion special na e rol di hende muhe den e resistencia contra sclavitud y oprecion colonial. Nan historianan pa hopi tempo tabata menos visibel, aunke hende muhe tambe a dirigi rebelionnan activamente, a hui, a mobilisa otronan y di varios manera a nenga di somete na e sistema di sclavitud.
E exposicion ta consisti di varios canvas visual cu ta duna e historianan aki bida. Adicionalmente, via codigonan QR na e exposicion, bishitantenan por wak videonan cu ta profundisa mas den e historia y nificacion di e varios individuonan y eventonan.
Tula ta tuma centro di escenario durante apertura na Corsou
Na Corsou, e apertura a tuma luga durante ‘Heroenan di Libertad: Un Experencia di Herencia’ na oficina di Comite di Conmemoracion Pasado di Sclavitud na Otrobanda.
Parti di e anochi tabata e estreno di un documental nobo tocante Tula, traha pa e cineasta German Gruber Jr. encarga pa Comite di Conmemoracion Pasado di Sclavitud. Den e documental di alrededor di 45 minuut, varios experto riba historia di sclavitud y bida di Tula ta comparti nan perspectivanan.
Central den e pelicula ta e lucha cu Tula a cuminsa dia 17 di augustus 1795, hunto cu hopi otro. E lantamento a crece bira e lantamento di libertad di mas grandi den historia di Caribe Hulandes. Alrededor di 2.000 hende eventualmente a join e movemento. Tula su lucha pa libertad y dignidad humano a crece bira un simbolo duradero di resistencia.
Siguiendo e documental, a tuma luga un Bou’i Pal’i Tamarein. Durante e sesion di dialogo aki, presentenan a papia tocante e lucha cu Tula a hiba, su nificacion pa Corsou y sobra di Reino Hulandes y e forma con su legado ta sigui resona te awe.
Di sclavitud pa libertad y mas leu
‘NOS: Caminda Pasado y Presente ta topa’ ta pone e historianan di resistencia den un contexto historico mas amplio. E exposicion no solamente ta enfoca riba e periodo di sclavitud y su abolicion formal na 1863, pero tambe ta mustra cu e lucha pa libertad real, igualdad y autodeterminacion a sigui despues di esey.
Haciendo esaki, e exposicion ta invita bishitantenan pa mira e historia di sclavitud di un manera diferente: no solamente for di punto di bista di loke a haci cu hende, pero tambe for di punto di bista di con esnan sclavisa a resisti, a exsigi libertad y pa medio di esaki a yuda habri caminda pa futuro generacionnan.
23 di augustus
Deliberadamente a tene e apertura simultaneo na Aruba, Boneiro y Corsou, riba 23 di augustus, cu ta Dia Internacional pa Recuerdo di Comercio di Catibo y su Abolicion. E dia aki ta enfoca riba e historia di e comercio di catibo transatlantico, e resistencia contra esaki, y e lucha cu finalmente a conduci na abolicion di sclavitud.
Cu e apertura simultaneo riba tres isla y e siguiente aperturanan na Sint Maarten, Saba y Sint Eustatius, Comite di Conmemoracion Pasado di Sclavitud tin como meta pa conecta e historianan di resistencia for di e varios partinan di Reino y haci nan accesibel pa un publico amplio.
Exposicion gratis pa bishita
Na Corsou, ‘NOS: Caminda Pasado y Presente ta topa’ por wordo bishita na e oficina di Comite di Conmemoracion Pasado di Sclavitud na Bèlvedèrestraat 43–45 na Otrobanda. Na Boneiro, e exposicion ta na biblioteca publico, y na Aruba na Archivo Nacional di Aruba. Entrada ta gratis.
