Lider di fraccion di MEP, Evelyn Wever-Croes, a expresa su preocupacion pa e falta di transparencia di Minister Gerlien Croes den un caso cu ta den procedura dilanti LAR.
Den cuadro di e falta di contesta, a presenta e caso dilanti di LAR. Despues di un periodo di 8 siman di trabou, diabierna ultimo LAR a emiti su conseho oficial y a mand’é pa Gobierno (pa Minister Gerlien Croes).
Segun Evelyn Wever-Croes, e minister tin e obligacion di duna e fraccion un copia di e conseho/decision y tin un plaso di 6 siman pa dicidi si e ta sigui e conseho emiti pa LAR of no. Segun Wever-Croes, e minister no por apaga e caso, pasobra tin varios conseho huridico, entre otro di un experto di aviacion Americano, pero tambe di abogado na local, manera abogado Daisiree Croes, cu ta bisa cu e minister no por a paga. E avion aki no tin e licencia pa por cobra y si e minister a paga, e ta cometiendo un acto contra ley.
E lider di fraccion a señala cu ta importante pa e informacion aki bira publico, pero casi 8 luna despues, ainda e minister no a entrega e informacion. P’esey no a keda otro opcion cu sigui e procedura na ley y acudi na e proceso di fiscal y LAR pa haya e informacion.
“Nos ta spera cu e minister tuma e conseho den consideracion,” Wever-Croes a bisa, agregando cu nan ta pidi e minister pa duna nan un copia di e conseho aki. “Nos ta pidi awo mes pa duna nos.”
Si despues di 6 siman e minister sigui nenga di duna e informacion, ta ora cu nan ta bay pa Corte di Husticia, pa asina sigui e procedura di LAR pa Corte di Husticia dicta e ora cu mester por haya e informacion. Sinembargo, Wever-Croes a enfatisa: “Ta un berguensa cu un minister ta keda rek asina tanto te cu tin cu yega corte.”
Wever-Croes a conclui cu e minister mester duna transparencia, pasobra esaki no ta un fabor, sino un deber di un gobernante. “E minister por caba cu e discusion aki awo mes, dor di djis contesta e preguntanan,” el a finalisa.