cu elogio na Etty Toppenberg
Etty Toppenberg, manera ta conoci, a nace den e bario di Companashi. Un persona cu a stima su dushi idioma Papiamento. Nos por corda con Etty tabata uza Papiamento na un forma creativo, dificil pa hopi musico. E tabatin e don pa, den un situacion peculiar, formula frase na Papiamento cu ta rima of cu tabata parti di un couplet, mientras e frase mester a sincronisa cu e melodia di su guitara. Masha poco musico por haci esaki.
Pues, Etty tabata un gran cantante y compositor Arubiano cu gran talento musical. Semper cla pa, gratuitamente, comparti tur clase di cancion cu su hendenan, cu su bos maraviyoso, semper den harmonia cu e melodianan bunita di su guitara. Cu e forma con Etty y su Trio Huasteca tabata deleita publico, nan a gana hopi cariño y amor no solamente na Aruba, pero tambe rond mundo.
Etty tabatin hopi amor pa idioma Papiamento. E tabata convenci di e balor di Papiamento. Casi tur su cancionnan el a compone na Papiamento. Etty su gran deseo pa mira orguyosamente con Papiamento ta planta su bandera den exterior, a bira realidad.
Un di su canticanan hopi famoso, “Baile di Seu”, a biaha rond mundo. “Baile di Seu” ta na Papiamento y asina Etty a sa di exporta su idioma materno Papiamento y pon’e den estudio di musica y riba escenario rond mundo. Si, Etty tabata convenci cu un dia Aruba lo exporta y internacionalisa Papiamento. P’esey awe pueblo di Aruba y directiva di Fundacion Lanta Papiamento ta hopi orguyoso, cu Etty su composicion “Baile di Seu” ta e “Cantica di Planeta Tera” (“Earth Song”). Esaki kiermen, cu tur presentacion di e cantica aki den exterior mester ta canta y presenta den e idioma y presentacion original, loke ta conta tambe pa e movecion di e koor. Un cos fabuloso.
Aruba ta sinti Etty su falta y Fundacion Lanta Papiamento ta masha gradecido pa loke Etty a haci pa Papiamento y cu el a exporta Papiamento rond mundo. Fundacion Lanta Papiamento, como un organisacion no gubernamental, ta considera Etty como un heroe y e ta motiva nos di directiva pa sigui lucha incansablemente pa un miho status y desaroyo continuo di nos dushi idioma Papiamento.
Papiamento, nos idioma, nos derecho.