Tourism Corporation Bonaire, huntu ku Ofisina di Haf di Boneiru riba djárason 19 di ougùstùs 2026 a yama representantenan senior di Carnival Cruise Line bon biní na Boneiru. E bishita di trabou a forma parti di e programa mas amplio di e delegashon na e islanan ABC i a brinda un oportunidat pa dialogá ku representantenan di e sektor públiko i e sektor turístiko di Boneiru.
E delegashon a konsistí di Sarah Reno, Chief Operations Officer di Carnival Cruise Line, i Marie S. McKenzie, Senior Vice President of Government and Destination Affairs na Carnival Corporation. E funshonarionan ehekutivo akí a bishitá Boneiru na momentu ku Carnival Horizon tabata den haf.
E programa ofisial a inkluí un rekorido na nos isla, un bishita na e barku i un lùnch na bordo di Carnival Horizon. Representantenan di e sektor públiko i di e sektor turístiko di Boneiru tabatin un enkuentro ku e funshonarionan ehekutivo di Carnival i di e manera akí nan a optené mas konosementu di e parti operashonal di e kompania krusero i su aserkamentu di e lasonan kolaborativo ku e destinashonnan ku e kompania ta bishitá.
Mas lat e tramérdia ei TCB a organisá un Meet & Greet informal na Pier Dos. Durante e enkuentro akí e delegashon di Carnival, stakeholdernan for di e sektor turístiko i representantenan di Entidat Públiko Boneiru, entre otro gezaghèber John Soliano i diputado Timoteo Silberie, a bini huntu.
Durante e bishita, e partisipantenan por a interkambiá di pensamentu den un esfera habrí i konstruktivo. E kòmbersashonnan a bai tokante prioridatnan konhunto, manera brinda un eksperensia positivo di bishitante, krea balor pa empresanan lokal i pa nos komunidat, mantené un koordinashon operashonal efektivo i duna sosten na un aserkamentu responsabel di turismo krusero ku ta reflehá e karakter di Boneiru.
“Carnival Cruise Line ta un partner importante i apresiá pa Boneiru. Pa medio di un diálogo direkto i habrí, nos por kompartí nos prioridatnan komo destinashon, sigui mehorá e eksperensia di bishitante i traha huntu pa garantisá ku turismo krusero ta krea un balor signifikativo pa nos sektor turístiko lokal i pa e komunidat boneriano mas amplio. Sinkronisashon di e interesnan akí ta sentral den nos aserkamentu di maneho di destinashon”, segun Elesiër Angel, direktor di Tourism Corporation Bonaire.
TCB lo sigui traha estrechamente huntu ku Entidat Públiko Boneiru, Ofisina di Haf, empresanan lokal, staleholdernan for di komunidat i partnernan for di e sektor krusero pa sostené un eksperensia krusero hospitalario i bon koordiná, kaminda Boneiru su interesnan i prioridatnan ta sirbi komo guia pa e diálogo ku ta kontinuá.
