E último Sunset Jam Session na SKAL a atraé un grupo grandi di músiko i amante di músika. Mas o ménos setentisinku persona a asistí, inkluyendo hopi hóben i mucha. E seshon tabata dirigí pa Luigino Luis “Moka” Molina. E Jam Session ta kresiendo den popularidat tur luna, i mas i mas hende ta partisipá.
Loke a resaltá e biaha aki ta ku hopi hóben y mucha a partisipá aktivamente. SKAL su seshon mensual ta demostrá ku músika ta konektá hende di diferente edat, antesedente i kultura.
Moka ta konta su historia
Moka a papia di un manera inspirativo tokante su trayekto musikal. El a papia tokante su ruman hòmber, kende a reta e pa hasi algu úniko. Tambe el a papia tokante kon e músiko Glen Lugo a yud’é haña su propio estilo. Tambe el a honra Ana Thode i otro músikonan boneriano importante ku a influensi’é.
Moka a bisa ku e ke sigui siña. El a hasi un yamada na músikonan mas grandi i kargadónan di kultural pa kompartí nan konosementu ku hóbennan. El a bisa ku músikonan yòn hopi bia ta risibí krítika pa nan erornan, en bes di sosten òf guia. Su mensahe tabata kla: “Yuda nan krese en bes di kibra nan”.
Durante e seshon, Moka a invitá músikonan di tur edat pa toka huntu. Nan a interkambiá instrumento i a kompartí nan konosementu. Asta esnan sin eksperensia musikal a bira kurioso i a djòin, por ehèmpel, ku e popular “Palito di SKAL.”
Plannan pa un skol di músika na Boneiru
Durante e anochi, SKAL a presentá un idea nobo: un skol di músika pa Boneiru. Bishitantenan por a kompartí nan opinion dor di yena un kuestionario digital.
E anochi a terminá ku kantikanan konosí di Moka manera “E Kabritu Aya” y “Piskado”. Klásikonan
manera “Madua ban kasé,” “Sebe,” i “Kantonan di Bari” tambe nan a interpretá.
Un partisipante hóben tabata konmoví i a bisa ku ta pa promé biaha, el a sintié parti di un berdadero banda—huntu ku su ídolonan di Palu Grandi, dirigí pa Moka. Otro presentenan a komentá ku e Jam Session a duna nan e chèns pa realmente toka huntu en bes di djis wak.
