For di despues ku frakshon MAN-PIN a hasi pregunta na Minister di SOAW riba indekasashon di penshun di behes AOV i a entregá un konsepto di lei di inisiativa pa adaptá e Ordenansa di AOV, minister di Finansa i Salú a bira razu i no ta duna espasio na e minister responsabel, esta minister di SOAW, Charetti America- Francisca, bisa nada.
Sr. Silvania, ku no ta e titular pa e AOV, a kuminsa tilda e frakshon di MAN-PIN di no a hasi nada, referiendo na un karta ku direktor di SVB a manda pa minister di Salú na 2017. Tin tur indikashon ku sr. Silvania a tuma nota di e karta I koseptonan di SVB, ya ku e tópiko di e karta ta referí na Ziektekostenverzekering, Ongevallenverzekering i AVBZ. No na penshun di behes, esta AOV. For di 2017 e gobièrnu a laga diferente servisio, entre esakinan GMN I Finansa, konseha riba e karta I konseptonanndi lei. Sr. Silvania sigur for di 2021 I despues tambe a mira e diferente konsehonan riba su mesa na Finansa I na GMN.
Hecho ta ku sr. Silvania tin ya mas ku 4 aña hungando ku interes i sentimentu di kobradónan di AOV pa puro probecho polítiko. Aki ta un bista den tempu di hechonan relashoná ku adaptashon di penshun di behes (AOV):
1. Na 2012, e minister di SOAW, sr. Koeiman (MAN) a adaptá AOV dor di ideksá esaki na kosto di bida, basa riba e Ordenansa di AOV di e tempu ei.
2. Na 2013, e gobièrnu di e tempu ei a adaptá e Ordenansa di AOV i kambia adaptashon di AOV basá riba inflashon pa adaptashon basá riba kresementu ekonómiko real di luna di ougustus di e aña anterior pa ougustus di e aña koriente. E motibu prinsipal di e kambio aki tabata pasó e fondo di AOV tabatin un defisit.
3. Na 2013 CBS, SVB i varios instansia a duna di konosé ku segun nan, kalkulashon di kresemente ekonómiko real di ougustus-ougustus no ta faktibel. Ningun frakshon den parlamento, inkluso frakshon di MFK a trese kambio den esaki.
4. Na november 2017 direktor di SVB a manda un karta pa minister di Salú referiendo na un karta ku ela manda for di 2013 i a konsehá pa adapta ZK, OV i AVBZ i tambe suherensha pa adaptá dos konsepto pa adaptashon di AOV, no opstante AOV ta un responsabilidat di SOAW segun lei di AOV.
5. E karta I koseptonan di lei a keda mandá for di yanuari 2018 pa varios otro ministerio entre esakinan WJZ i ministerio di Finansa pa koseho i dia 13 april 2020, den pleno Covid, a bai bèk pa WJZ pa sigui ku e proseso legislativo. E proseso a sigi bou di Kabinete Pisas 2 I na varios okashon tabata na ministerio di GMN I di Finansa entre 2021 pa 2024.
Entretanto nos frakshon a keda informá ku SVB no a manda e karta pa e ministerio konserní di SOAW na 2017.
6. Sr. Silvania sa ku for di 2021 te 2024 kosto di bida a subi ku entre 3 pa 6% kada aña. E subida di kosto di bida drástiko ei si lo a kondusí na oumento di AOV supstanshal for di yanuari 2022 te ku awor.
7. Na 2017 kabinete Pisas I no a hasi ningun intento pa kambia e Ordenansa di AOV pa benefisiá kobradónan di AOV.
8. Na novémber 2023 Raad van Advies a mustra minsiter di finansas, sr. Silvania, riba e diskrepansha entre e solushon pa penshonadonan di ENNIA risibí 100% di nan penshun, mientras kobradónan di AOV su penshon lo no keda indeksá. Sr. Silvania a skohe konsientamente pa no indeksá AOV manera Raad van Advies a konsehá.
9. Na ougùstus 2024 sr. Silvania a keda nombrá komo minister di SOAW, despues ku a saka PNP for di gobièrnu. Banda di su funshon komo minister di Finansa i minister di GMN, sr. Silvania komo minister di SOAW, dia 12 di sèptember 2024 den reunion públiko di Komishon Sentral a primintí di oumentá AOV entrante 1 yanuari 2025.
10. Ni na e okashon ei ni despues, sr. Silvania den su kalidatnan di minister di Finansa i minister di SOAW, no a manda e konsepto di Ordenansa riba AOV pa SER ni pa Raad van Advies. E susesor di sr. Silvania tampoko a hasi esei den e periodo òktober 2024 pa yuni 2025 (9 luna).
13. Sr. Silvania riba 15 yuli 2025 ta informá kobradónan di AOV ku e lo no oumentá AOV entrante 1 yanuari 2025, pa motibunan polítiko, esta pa motibu ku MAN-PIN a hasi lokual e no a hasi for di aña 2023. Esaki, apesar ku dia 12 september 2024 den Komishon Sentral sr. Silvnia a primintí un oumento den AOV entrante prome di yanuari.
Banda di e hecho ku sr. Silvania no por mustra riba ningun akshon konkreto pa oumento di AOV i ta awor e ka kore yama reunion ku esnan envolví, sr. Silvania ta ultrahá kobradónan di AOV deklarando ku “es por ver” si ta paga un oumento di AOV den 2026. Frakshon di MAN-PIN no por pèrdè for di bista e intento di keda perhudiká kobradónan di AOV te den porta di e siguiente elekshon, manera esaki a tuma luga durante e kontienda elektoral.
P’esei MAN-PIN ta hasi un apelashon sinsero na sr. Silvania i prinsipalmente na e titular di SOAW, sra. Charetti America- Francisca pa para e mal trato na penshonadonan i indeksá di e penshun di behes AOV segun lei. Den esaki sigur minister di SOAW por konta ku sosten di MAN-PIN.