Detenshonnan pa manehá bou di influensia di alkohòl
Den e dianan ku a pasa, polis a detené tres shofùr pa manehá bou di influensia di alkohòl. A hasi un tèst di supla ku nan ku resultado positivo.
Djaweps 11 di desèmber, alrededor di 11.10 or di anochi, ‘meldkamer’ sentral a risibí notifikashon tokante un aksidente entre dos outo na Kaminda Lagun. Un di e shofùrnan tabata keha di doló i personal di ambulans a dun’é tratamentu médiko na e sitio mes. Konforme e maneho di ‘botsen is blazen’, a hasi tèst di supla ku ámbos shofùr. Serka un di e shofùrnan e resultado tabata positivo di kua a detené pa manehá bou di influensia di alkohòl. Ta trata di un hòmber di inisial G.v.R. di 32 aña di edat. A konsekuensia di e resultado di e análisis di rosea, a konfiská reibeweis di e sospechoso.
Djárason 10 di desèmber, alrededor di 10.40 or di anochi, a detené un hòmber di inisial R.A.E. di 64 aña di edat na Kaya Ir. Randolph Statius van Eps pa manehá bou di influensia di alkohòl. Un patruya a para e sospechoso pa motibu ku e tabata kore zeilu riba kaminda. Durante di e kòntròl a hasi un tèst di supla kuné, di kua a resultá ku el a konsumí mas alkohòl ku ta permití na momentu ku bo ta manehá un vehíkulo. A hib’é warda di polis pa un análisis di rosea i a konsekuensia di e resultado di esaki, a konfiská reibeweis di e sospechoso.
Djárason 10 di desèmber, alrededor di 3.20 or di atardi, ‘meldkamer’ sentral a risibí notifikashon tokante un aksidente entre dos vehíkulo na e krusada di Kaya Internashonal i Bulevar Julio A. Abraham. Ta trata di un vèn i un ‘buggy’. E ‘buggy’ tabata pará pa lora na su man robes na momentu ku e vèn a dal patras na e banda robes di e ‘buggy’. Konforme e maneho di ‘botsen is blazen’, a hasi tèst di supla ku ámbos shofùr. Serka un di e shofùrnan e resultado tabata positivo di kua a detené pa manehá bou di influensia di alkohòl. Ta trata di un hòmber di inisial R.P. di 35 aña di edat. A konsekuensia di e resultado di e análisis di rosea, a konfiská reibeweis di e sospechoso.
Detenshon pa insulto di ámtenar den funshon i pa no kumpli ku señal pa para
Den oranan di anochi di djaweps 11 di desèmber, alrededor di 8.30 or, un persekushon a tuma lugá ku a terminá ku un detenshon na Kaya Dr. Jose Girigorio Hernandez. E motibu tabata ku un patruya ke a para shofùr di un outo pa un kòntròl rutinario riba Kaya Papa Cornes, pero e shofùr a ignorá e señal pa para. E patruya a sigui e vehíkulo den diferente kaya, despues di kua e shofùr a drenta den kurá di un kas na Kaya Dr. Jose Girigorio Hernandez.
Durante e kòntròl, e shofùr a deklará inisialmente ku e no ta mustra su reibeweis, pero despues el a hasi esaki, huntu ku un prueba di seguro ku a kaduká.
E shofùr no a kumpli ku òrdu di e agentenan, a purba di stroba e kòntròl, a mishi ku un agente dos biaha i insultá e agentenan vários biaha. Durante e kòntròl, a listra e shofùr i e vehíkulo. A detené e hòmber di inisial J.C.J.W. di 24 aña di edat pa insulto di un ámtenar den funshon i pa no a kumpli ku òrdu di polis.
Kuerpo Polisial Hulanda Karibense no ta tolerá niun tipo di violensia ferbal òf físiko kontra agentenan polisial. Aparte di detenshon pa e delitonan kometé, e agentenan tin tur derecho pa entregá un keho kontra e sospechoso(nan) pa kualkier forma di maltrato ku nan ta eksperensiá tantu ku ünifòrm òf den nan ora liber. Un komportashon trankil di un i tur durante kòntròl i na momentu di konstatá violashon, ta kondusí na un solushon pasífiko ku ta deseabel pa un i tur.
Ladronisia di bateria di ‘fatbike’
Djaweps 11 di desèmber a drenta notifikashon tokante ladronisia di un bateria di baiskel ‘fatbike’. E ‘fatbike’ tabata stashoná na un skol situá na Kaya Frater Odulfinus. Deskonosínan a bai ku e bateria. Ta investigando e kaso.
Kòntròl di tráfiko
Den oranan di anochi di djárason 10 di desèmber a tene un kòntròl planíá di tráfiko na Kaya Korona. A para i kontrolá un total di diesnuebe (19) vehíkulo, di kua a duna shete (7) but.
E butnan tabata pa e siguiente violashonnan:
2x pa manehá sin seguro bálido;
3x pa manehá sin reibeweis bálido;
1x pa no por mustra un reibeweis na promé instante;
1x pa no tin faha di seguridat bistí.
Un (1) shofùr no por a sigui kore, pa motibu ku e no tabata den poseshon di un reibeweis i prueba di seguro. Ademas, su outo tabata den mal kondishon. Vários lus tabata defekto i e kashi di lus patras tambe tabata kibrá.
Lo tene e kòntròlnan aki regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Akshon kontra stashonamentu robes
Djárason 10 di desèmber a tene un akshon planíá kontra outonan mal stashoná. Un patruya a konstatá ku atrobe tabatin diferente outo mal stashoná na Kaya J.E. Nicolaas. Riba e kaya menshoná, un prohibishon pa para ta na vigor pa tur dos banda di kaminda. E kaya aki ta un kaminda di dos direkshon, pues ta prohibí pa stashoná riba kaminda òf asera i stroba tráfiko.
E outonan tabata stashoná riba kaminda. Kuater (4) shofùr a haña but i a tou dos outo. Kuerpo Polisial Hulanda Karibense (KPCN) ta atvertí ku lo tou vehíkulonan mal stashoná na sitionan ku no ta permití pa stashoná. Personanan ku kometé violashon por haña un but i e gastunan di tou ta bini riba kuenta di e shofùr di e vehíkulo.
Aksidente entre vários vehíkulo
Djárason 10 di desèmber, alrededor di 7.05 or di mainta, ‘meldkamer’ sentral a risibí notifikashon tokante un aksidente entre vários vehíkulo riba E.E.G. Bulevar. Na yegada di polis a resultá ku un shofùr a pèrdè kòntròl pa motibu ku diripiente un otro vehíkulo a sali su dilanti. Pa e motibu aki el a dal den vehíkulonan stashoná kantu di kaminda.
E shofùr tabata keha di doló i personal di ambulans a dun’é tratamentu médiko na e sitio. Konforme e maneho di ‘botsen is blazen’, a hasi un tèst di supla ku e shofùr ku resultado negativo. Polis a dirigí tráfiko temporalmente na e sitio te na momentu ku e servisionan konserní a terminá ku nan trabou.