Sinku hoben talentoso di e proyekto Gang di Arte di ACE Foundation Bonaire a duna un presentashon den e prestisioso Young Creators Festival, ku ta e gran final di e kompetensha di arte konosi komo Kunstbende Nederland.
For di 25 te 29 di juni, K’Jar Martines, Romy Ridderbeks, Valeria Lara, Zaymari Rojas, i Davenley Lauffer a pasa un eksperensia ku a kambia nan vishon di arte i kultura. Amsterdam, tabata kaminda nan a mustra nan talento den e prestigioso sentro kultural Melkweg.
Nan partisipashon ta e resultado di hopi aña di kolaborashon entre ACE Foundation i Kunstbende Nederland, un relashon ku a nase durante Weganan di Reino Kultural ku a tuma luga na aña 2009. Aunke e preparashon tabata solamente tres siman largu, ACE Foundation a logra pa hiba e hobennan aki Hulanda hasiendo un esfuerso enorme pa yega na fondo, huntu ku lider artistiko di e proyecto Xechell Jacobs i direktora di ACE Foundation, Marlies Vels.
E hobennan a presenta un show kaminda ku nan a trese dilanti varios di nan talentonan entreo otro baile, kanto i poesia. E show a hiba komo titulo “E kabuya invisibel”. E kontenido di e kabuya invisibel ta ku e hobennan a presenta e diferensia ku ta eksisti entre kada hoben su bida i ku e diferente situation i problemanan pero ku toch tin un kabuya ku ta konektanan na otro i dor di diskubri e kabuya invisibel nan por konekta ku otro i yuda otro/
Pa mayoria di e hobennan, esaki tabata nan prome biahe pa Hulanda. Ademas di nan presentashon na Melkweg, nan a bishitá Amsterdamse Hoogeschool voor de Kunst (AHK), un instituto prestisioso di arte na Amsterdam, kaminda nan a haña informashon tokante formashon artistiko di na nivel di HBO i a papia konkretamente tokante posibilidad di intenshon di kolaborashon den futuro ku Boneiru. Un otro momentu inspirativo tabata e bishita na Bijlmerparktheater, kaminda e hobennan a bin topa ku un profeshonal den e industria kreativo ku ta e konosido aktor Anton de Bies, un artista yu di Korsou ku a termina su estudio di aktor na nivel haltu na Toneel Academie Maastricht. E tipo di enkuentro personal ku hendenan di nos propio orígen ta motiva i mustra ku konkretamente nos por logra den mundo di arte pa bira profeshonal.
Un parti spesial di e biahe tabata e kolaborashon ku hobennan di Kòrsou i Hulanda. E interkambio interkultural aki no solamente a fortalese e sintimentu di konekshon entre e isla-nan i Hulanda pero tambe a habri bista nobo tokante kultura i talento. E biahe ta demostrá ku interkambio internashonal tin un balor grandi pa talento hoben, i ta konfirma e importansia di kolaborashon struktural den sektor kultural. Pa futuro, e eksperensia exitoso aki ta pone un fundeshi pa mas kolaborashon, ku posibilidad konkretamente pa mas interkambio.
E hobennan a bolbe Boneiru ku konosementu nobo, eksperensia, inspirashon, i a logra ekspande nan “netwerk”. ACE Foundation ta kontentu di por a inverti den futuro di nos hobennan i den desaroyo kultural di Boneiru na un manera general.
