Honra mi a sintimi di tawata invita na e lansamento di e documentario y pelicula historico “Si e baranca por a papia – storianan di sclavitud” di Aruba su periodista Melissa Stamper. E lansamento, riba tapijt cora, a tuma luga na e sitio historico cu geograficamente tin mas cu 90 miyon aña, esta den curason di Parke Arikok na San Fuego. E mc tawata Mary-Ann Falconi. Algun persona cu posicion clave y importante na Aruba cu tawata presente ta su excelencianan gobernador di Aruba sr. Alfonso Boekhoudt y Prome Ministro Mike Eman. Honorabel miembro di parlamento Xiomara Maduro tambe tawata presente. Por a mira e cast completo di e produccion na e lansamento.
Mi admiracion ta bay pa Melissa Stamper, Randall Luidens, Elai Petronia, e cast completo, Parke Arikok y sigur cada sponser cu a carga e produccion importante aki.
Den e prome parti di e documentario varios ta e personanan cu Melissa a entrevista y cada un a comparti nan conocimento riba e tema historico aki. Un actuacion riba nivel halto ta presenta pa cada un di e actor- y actrisnan di e pelicula.
Pabien grandi ta bay pa cada persona cu tawata parti di e produccion unico, bunita y sigur importante aki den e historia di Aruba cu pa hopi ta lubida.
Como educador na scol den e materianan Aardrijkskunde y Geschiedenis, mi ta recomenda Aruba henter pa bishita e documentario historico aki na cinemanan local e simannan cu ta bini.
