Den e informe di 5 or di madruga cu National Hurricane Center a emiti pa awe dia 18 di augustus,
ta raportando cu horcan Erin ta perde un tiki forsa di categoria 5 pa categoria 4. Actualmente e horcan ta ubica na e coordinadonan 23.1°N 70.5°W cu ta situa e horcan 107 miya (189 kilometer) for di costanan di Turks and Caicos, cu tin alerta di tormenta den efecto pa e islanan ey. E tormenta meteorologico ta situa na 530 kilometer for di capital di Republica Dominicana, esta Santo Domingo riba e isla Hispanola.
E horcan ta moviendo cu un velocidad di 13 miya pa ora, cual ta un reduccion compara cu dianan anterior. Un sistema meteorologico asina ta uza hopi energia pa e por haci e curva bay ariba y su velocidad ta baha un poco. E bientonan sosteni a keda cu un velocidad di 130 miya pa ora den e centro di e horcan, esey ta 209 kilometer pa ora. Rafaganan por yega te cu 155 miya pa ora ( 250 km/u). Danki Dios cu e horcan Erin no a haci ‘landfall’ pasobra consecuencia di un cyclon asina lo ta devastador.
Aparte di destrui tur loke ta matanan di decoracion y matanan grandi, bientonan cu un intensidad asina lo ranca tur borchi, daknan lo por wordo ranca completo for di un edificio. Un sistema asina por laga un desastre atras, rancando porta, bentana y causando destruccion masivo. EANews lo sigui informa. Adhunto un foto di e centro di horcan Erin, captura door di e Hurricane Huntersnan.
