Dialuna mainta, Minister di Husticia mr. drs. Arthur Dowers a yama bon bini na un delegacion di Kustwacht Aruba na Centro di Gobernacion. Den presencia di Minister, famia y amigonan, a tuma luga e ceremonia di huramentacion di cuatro funcionario di Kustwacht, cu a huramenta como Buitengewone Agent van Politie.
Cu e huramentacion aki, e funcionarionan nobo a ricibi e autoridad legal pa actua contra crimen, mescos cu un agente policial. Nan lo por traha proces-verbaal, contribui cu e proceso di siguridad y tambe actua den caso di infraccionnan di ley.
Minister Dowers a enfatisa cu ora un funcionario den husticia ta huramenta dilanti di e Rey, e ta pone su mes bao di un marco di reglanan estrictamente defini pa e bon funcionamento di e organisacion hudicial. Esaki ta inclui e compromiso di secrecia, integridad y obediencia na e ley y normanan cu ta haci un institucion integro y confiabel.
Mark Solognier, Comandante di Kustwacht Aruba, presente na e ceremonia di huramentacion, a felicita e 4 kustwachternan, cu ta forma parti di e klas 2024–2025. Nan tin algun tempo den funcion caba na Kustwacht, y cu e huramentacion oficial como Buitengewone Agent van Politie, nan por cumpli cu nan debernan cu mas autoridad y efectividad.
Gobierno di Aruba, a traves di Minister di Husticia Arthur Dowers, ta sigui inverti den e institucionnan hudicial, sigurando un sistema di ley cu autoridad y transparencia pa proteccion di nos comunidad.