Aruba One Happy Island Lions Club ta invita comunidad pa forma parti di e Lions 5k fun run/walk 2.0, cu lo tuma luga Diasabra, 29 di maart 2025. Miembro di Aruba One Happy Island Lions Club Junior Arends ta encarga cu e di dos fun run/walk. E actividad aki ta tuma luga panort di Costa Linda Beach Resort direccion pa Phoenix Hotel y bay bek, esaki ta un largura di 5 KM. Esaki ta un fun run walk cu ta invita tur hende pa participa unda grandi y chikito por participa. E evento aki no ta trata di ta un competencia, pero mas ainda ta pa uni famia, colega, amistad pa diberti hunto y asina haci algo sano hunto.
Anja pasa tabata prome biaha cu Aruba One Happy Island Lions Club a organisa esaki y e tabata un exito , e biaha aki ta spera cu e ta bira un exito hopi mas grandi. Banda di cu e ta un Lions 5k fun run/walk pa diberti na mes momento Aruba One Happy Island Lions Club ta recauda fondo y cumpli cu e necesidadnan den nos comunidad y uni famia. Aña pasa tabatin un cantidad di premio cu a ser reparti y e aña aki tambe lo tin diferente premionan.
E suma cu recauda lo keda reparti den diferente proyectonan cu Aruba One Happy Island Lions Club ta haci durante aña pa yuda comunidad di Aruba.
