Poeta reconoci na Aruba, Ruthy Vrieswijk, a expresa su inconformidad cu e trato cu su defunto mama a ricibi na Hospital di Aruba. Segun Vrieswijk, e cuido medico cu su mama di 89 aña a haya ta constitui negligencia, loke cu finalmente a conduci na su fayecimento.
Manera ta derecho di cada ciudadano, Vrieswijk a presenta un keho formal contra Hospital di Aruba. Segun Vrieswijk, despues di mas cu tres luna di espera, e keho finalmente a wordo trata durante un hoorzitting cu a tuma luga riba diaranson, 15 di januari 2026. Den e hoorzitting tabatin seis representantenan di banda di hospital presente, mientras cu na banda di Vrieswijk, solamente dos persona tabata permiti pa drenta den salauno y e otro mester a warda pafo, un situacion cu el a cualifica como inhumano.
Vrieswijk a comparti cu su intencion principal pa haci publico su historia ta pa preveni cu e situacion aki no ripiti cu ningun otro adulto mayor. “Mi kier cu nos grandinan wordo trata cu respet y dignidad,” el a declara.
Segun Vrieswijk, su mama a wordo neglisha durante su estadia den hospital, for di e inicio te na momento cu e a fayece. El a señala cu despues di e keho a wordo presenta, a dura mas cu tres luna pa e hoorzitting tuma luga. Aunke el a reconoci cu trato durante e hoorzitting tabata respetuoso, el a lamenta cu tabatin hopi confusion, contradiccion den fechanan y informacion cu, segun Vrieswijk, a trece duda riba transparencia di e proceso.
Entre e preguntanan cu a wordo puntra tabata e falta di claridad riba ken a autorisa administracion di dosis halto di glucose y remedi calmante na su mama, a pesar cu e pashent ya tabata presenta sintomanan di demencia of Alzheimer. Segun Vrieswijk, ningun hende presente no por a contesta ken tabata responsabel pa e decisionnan medico aki.
Den e hoorzitting, dokter D, L tabata presente, pero dokter D.T, cu tabata di warda durante e periodo cu su mama tabata hospitalisa, no tabata presente. Segun Vrieswijk, esaki a laga hopi preguntanan sin respuesta, incluyendo ken tabata responsabel pa siguimento diario di e pashent.
Vrieswijk a critica cu ora su mama su sucu a baha drasticamente, e enfermeronan no tabata cla con pa actua y tabata yama dokter sin ricibi respuesta inmediato, pasobra e dokter tabata ocupa. Segun Vrieswijk, esaki ta mustra falta di teamwork y posibel escasez di personal medico.
El a expresa tambe su inconformidad cu uzo di termino “delier” pa describi su persona, un caracterisacion cu, segun Vrieswijk, no tabata corecto y no tabata representa como un dokter respetuoso.
A pesar di tur e dolor, Vrieswijk a expresa cu el ta contento cu a haya un hoorzitting pa por expresa su dolor y experiencia. Sinembargo, el a enfatisa cu “na final, ningun banda no a gana: mi a perde mi mama, y pueblo a perde confiansa den hospital.”
Segun Vrieswijk, despues cu el a comparti su relato publicamente, varios otro ciudadano a acerca su persona cu nan mes experiencia tocante trato di adulto mayor na hospital. Esaki, segun Vrieswijk, a crea insiguridad den comunidad, unda cu hopi hende grandi, a pesar cu nan ta paga AZV, tin temor pa wordo hospitalisa.
Vrieswijk a menciona tambe rol di AZV, señalando cu limitacion presupuestario por ta afecta e cuido cu adulto mayor ta haya no ta na su luga debi cu ta e adulto mayornan aki a paga aña nan largo mara na nan edad cu AZV tin placa. Sinembargo, el a subraya cu ningun circunstancia, sea escasez di personal of burnout, no por sirbi como excuus pa negligencia medico.
“Tin bon dokter y tin mal dokter,” Vrieswijk a declara, “pero ningun excuus no ta valido pa neglisha di pashent.”
El a conclui cu un yamando fuerte pa respet y dignidad pa adulto mayor. “Promesa di un dokter ta pa yuda, sanea y salba bida, sin discriminacion di edad, rasa of condicion,” el a enfatisa.
Finalmente, Vrieswijk a indica cu su decision pa presenta un keho tabata pa bati alarma y conscientisa tanto comunidad como futuro profesionalnan di medicina. “Un hende no mester scoge e profesion di dokter pa titulo, jas blanco of placa, pero pa yamada di curason y amor pa su prohimo,” el a conclui.
