Caso Avestruz, cu tin di haber cu otorgamento di terenonan publico na persona y companianan cu a bende esakinan despues sin construccion, ta algo cu a cuminsa wordo investiga na momento cu un keho a drenta. Y esaki tabata un keho di un Fundacion Hulandes di J. de.R.
Prome cu cambio di Gobierno caba na 2017 tabatin hopi speculacion y denuncianan publico riba e forma con cierto personanan liga na e Gobierno tabata haya opcion riba terenonan publico. Sinembargo tabata momento cu e Fundacion di un Hulandes masha conoci J de R a yega OM cu denuncia a wordo haci, e investigacion real a inicia.
Contrario na loke ta wordo bisa awo den arena politico, e no tabata bou presion di Otmar Oduber a cuminsa haci e investigacion. Si ta berdad cu na momento cu Otmar Oduber a bira Minister di e carteranan cu tabata di Sevinger, el a wordo poni na altura door di Ministerio Publico cu tin un investigacion andando riba e departamentonan en cuestion y cierto maneho hiba. Tempo cu Sevinger a sinta, tambe a haci un investigacion interno di con Marisol Lopez Tromp a haci su maneho.
Normal ta na momento cu cualkier Minister asumi su puesto nobo, e ta laga haci un inventarisacion, of un investigacion interno di e situacion prome cu el a yega, pa evita cu e ta haya su mes den problema cu decisionnan tuma anteriormente. Esaki ta un investigacion interno y no un investigacion penal. Di resultado di e investigacion interno haci, el a entrega e dossier na OM cu un keho riba tur loke el a descubri. Sinembargo e keho aki no a cana, pasobra nada di loke el a entrega tabata cosnan castigabel cometi den e departamento.
Probablemente e confusion a bini na momento cu el a manda un carta pa OM bisando cu den e investigacion interno cu el a haci, a topa cu diferente iregularidad, incluyendo di e exminister. Pero mester bisa tambe cu ningun di e casonan di iregularidad cu el a descubri como Minister, no ta forma parti of a wordo inclui den investigacion Avestruz. Simplemente pasobra e file di Minister Otmar Oduber no tabata relevante. E bruhamento tabata den e maneho y no tabatin hechonan castigabel den otorgamento di e terenonan. P’esey a crea un maneho nobo pa loke ta otorgamento di tereno.
Avestruz ta contene investigacion relaciona cu e denuncia haci door di e Fundacion Hulandes di J de R. E carta cu ta circula rond cu Oduber a yega di manda OM, por mira cu ningun di e personanan ey a wordo envolvi den caso Avestruz. Solamente el a bisa cu e ta entrega tur documento di e investigacion cu el a descubri pa wak si tin algo castigabel a tuma luga. E no a bisa niun momento pa persigui e hendenan