Kiwanis Club of Palm Beach (KCPB) a tuma nota di algun publicacion insinuando cu KCPB lo no ta aportando na Carnaval y cu KCPB lo ta actuando contra ley pa cu e fiesta anual di Masquerade. KCPB ta lamenta e insinuacionnan aki.
Pa 40 aña KCPB ta contribuiendo na nos comunidad, cu un cantidad grandi di proyectonan na beneficio di desaroyo di muchanan ariba nos isla. Tambe KCPB a bin ta haci donacionnan cuantioso pa un cantidad grandi di organisacionnan cu ta aporta na educacion, deporte, y na garantisa cu muchanan no mester pasa hamber na Aruba.
KCPB ta organisa diferente actividadnan pa genera fondo pa por cumpli cu e metanan menciona. E tent di KCPB na paradanan di Carnaval y e fiesta di Masquerade ta dos di e actividadnan pa genera e fondo necesario. E dos actividadnan aki ta posibel cu aporte di diferente comerciantenan cu ta permiti KCPB usa nan tereno/edificio priva y/o ta haci donacion pa por logra esaki.
KCPB ta consisti di un grupo dedica di boluntario cu ta aporta di nan mes cartera, tur luna financieramente y ta duna tur dia di aña di nan tempo liber pa logra e metanan ariba menciona. KCPB su focus ta pa aporta na comunidad general y lo sigui haci esaki cu hopi amor.
Manera costumber, despues di actividadnan di KCPB, tur fondo crea lo wordo reparti na organisacionnan cu ta aporta na interes general. Asina KCPB lo sigui pone su energia y dedicacion na cosnan positivo pa comunidad di Aruba. KCPB ta gradici cada un persona, organisacion, commerciante cu ta yuda KCPB pa logra e meta di yuda comunidad di Aruba.
Kiwanis Palm Beach ta pertenece na e organizacion global Kiwanis Internacional cu ta un instancia caritativo dedica na haci nos mundo mihor door di cambia un comunidad pa medio di un mucha cada bez. Mas informacion por haya riba: www.facebook.com/kiwanispalmbeacharuba of nos pagina di web:
www.kiwanispalmbeach.com
