HulandaPoliticaFeatured

Knops: Entidad Caribense no ta kita autoridad di Parlamento

Islanan Karibense

DEN HAAG , Hulanda

Raymond Knops, secretario di estado di Asuntonan Interno y di Reino, a contesta pregunta di miembronan di Tweede Kamer. Dunando un splicacion largo riba e tema di ayudo na e islanan, e condicionnan poni, pakico, pero tambe cu e entidad di control no ta viola autonomia di e islanan.

E ta splica esaki den e punto “Stand van zaken concept-Rijkswet Caribische hervormingsentiteit”. Esaki tabata preguntanan haci door di Parlamentarionan Diertens (D66) y Kuiken (PvdA) riba e condicionnan di ayudo di emergencia y lantamento di e entidad CHE na Aruba y e islanan Corsou y Sint Maarten.

Knops ta papia di e preocupacionnan expresa di diferente banda riba e impacto estatal di e Rijkswet proponi riba e islanan. A cuestiona, el a bisa, e proporcionalidad di e proposicion den cuadro di e Constitucion di e paisnan. “E preocupacion y cuestionamentonan aki no a sorprendemi,” Knops a bisa Tweede Kamer.

E ta bisa cu e reglanan den Rijkswet ta poco onortodoxo y Gobierno tabata consciente di esaki na momento di a traha e proposicion. Pero, e forma di colaboracion y ayudo  no ta adecuado aworaki, y tin hopi reto pa enfrenta. Ta menciona mal gobernacion despues di 10-10-10- y consecuencianan di coronavirus. “E retonan aki ta exigi hopi lihe un fundeshi huridico solido cu ta ofrece e pueblonan un perspectiva pa futuro y di otro banda duna Hulanda confiansa den e bon uzo di e ayudo financiero.”

E ta splica Tweede Kamer cu ora e menciona e palabra onortodoxo, esaki no ta nifica cu a viola reglanan di Constitucion. Statuut di Reino ta laga hopi espacio tanto den sentido di procedura como material ora di traha areglonan pa atende cu asuntonan cu e islanan mes no por atende. Y ta hustamente e espacio aki, e ta bisa, a uza pa bini cu e entidad.

Hulanda a pidi e islanan Caribense pa bay di acuerdo cu e institucion di un ZBO Hulandes cu ta apoya y monitornan, independientemente di Gobierno Hulandes. Y sin cu nan ta bay tuma autoridad cu ta pertenece na e organonan local. Inclusive, e derecho di presupuesto di Parlamento. Tur esaki ta keda intacto, despues cu e Rijkswet drenta na vigotr, como tambe e otro derechonan di Parlamento riba tereno di Gobernacion y legislacion.

Si Parlamento di un di e paisnan pa cualkier motibo no ta dispuesto pa bay di acuerdo cu cierto reformanan of financiamento di esaki for di nan mesun presupuesto, nan por wanta esaki. Consecuencia di esaki por ta cu e entidad of Gobierno Hulandes ta para completamente of parcialmente cu e ayudo financiero. Esaki no ta limitacion di democracia, pero cu reglanan democratico di e Sistema Hulandes.

Na opinion di Gobierno, e institucion di e entidad di reforma no ta viola autonomia di e islanan. E ta encera entre otro cu e islanan mes mester atende nan asuntonan. Pero awo e paisnan aki no por carga nan autonomia. “Hulanda kier yuda e paisnan aki pa yega nan autonomia nan mes. E entidad en cuestion, ora cu e drenta na vigor, ta bay atende cu e temanan aki. E lo por crea e impresion cu ta mishi cu e autonomia. Esaki sinembargo no ta e caso. No ta inusual cu den un “consensusrijkswet” ta duna cierto tareanan na otro organonan cu esnan di e pais mes.

Den e caso di CHE mester pensa cu e ley aki tin un caracter temporal. Seis aña despues cu e drenta na vigor, e ta caduca automaticamente. A menos cu e islanan mes dicidi di prolonga esaki.

Tur esaki, e ta bisa, ta exigi tempo. E idea di tur e esfuerso aki ta cu e meta pa e islanan a pone un fundeshi pa 2027 den cual nan autonomia constitucional ta funciona optimalmente.

E concepto di ley di e entidad aki a bay Raad van State pa conseho y el a priminti cu asina e conseho ta cla lo presente mas lihe posibel den Conseho di Minister di Reino.

Related posts

Arubahuis ta remarca: ‘Situacion di camber pa studiante na 2022 ta full otro cu 12 aña pasa’

EA News Author

Bon investigashon di fuente i kontakto, nos sa orígen di mayoria di e infekshonnan i por evitá mas infekshon.

EA News Author

Registracion pa Subsidio di Salario pa luna di november ta habri di dia 18 pa dia 25 di november 2020

EA News Author

Leave a Comment

Whatsapp Message