Durante oranan di mainta riba Dia di Rincon, Direktorado di Supervishon i Mantenshon di Lei di Entidat Públiko Boneiru (OLB), Kuerpo di Bombero Hulanda Karibense (BKCN) i Kuerpo Polisial Hulanda Karibense (KPCN), huntu ku e komishon organisadó di Dia di Rincon, a tene kòntròl riba stèntnan.
A kontrolá e kumplimentu ku e kondishonnan di seguridat i pèrmit. Aki a kontrolá entre otro lo siguiente:
– Si tabatin sufisiente distansia entre tènt i stèntnan pa limitá molèster i peliger di kandela.
– Ku ta usa solamente bòter di gas chikitu, poné korektamente pafó di e stènt, i ku ta disponé konekshonnan seif.
– Si tabatin aparatonan di paga kandela, manera un ‘brandblusser’ òf un slan, na stèntnan na kua ta kushiná òf grel
– Si aparatonan di kushiná i aparato eléktriko tabata pagá ora esaki no tabata den uso.
– Si tabatin ophetonan pegá na bòrchi di tráfiko, palu di lus òf monumentu.
– Si e rutanan di emergensia tabata liber di opstákulo.
– Si tabata usa bòter di glas òf bestèk frágil.
Banda di esaki a pone atenshon èkstra na siguridat di kuminda. A kontrolá e kondishonnan higiéniko i entre otro a midi e temperatura di kuminda kayente i friu. Na unda tabata nesesario a atendé ku e doño di stènt i mesora a hasi e ahustenan nesesario.
E servisionan ta ekspresá nan apresio pa e aktitut konstruktivo i koperashon di doñonn di stènt. Den transkurso di e dia lo sigui tene kòntròl na diferente orario, ku e meta pa sostené un selebrashon seif i ordená di Dia di Rincon.
