ORANJESTAD,Aruba
E siman aki sra. Dina Maria ta lansa su buki titula ‘Conoce bo isla’ riba mercado. Esaki ta tuma lugar na Biblioteca Nacional Aruba diabierna, dia 6 maart 2020 di 6or pa 7or di anochi. sra. Dina Maria a skirbi/produci e publicacion aki. sra. Dina Maria ta un persona cu semper ta interesa den e educacion di nos pueblo, specialmente nos muchanan.
Durante su carera di casi 40 aña den prensa, semper sra. Maria a considera medio di comunicacion como un medio di informacion y educacion. Sra Maria a yega di presenta pagina pa mucha den corant, programanan educativo pa mucha na television y tambe radio. Y ta durante esakinan a nace e idea pa bin cu un seccion di busca palabra na Papiamento.
‘Conoce bo isla’ ta e prome serie di buki di busca palabra na Papiamento den cual sra. Maria ta introduci nos pais na nos pueblo den un forma di wega y hopi informativo. Ta trata diferente topico cu tin di haci cu nos pais y di cual e prome edicion ta trata nos bario y cayanan.
Segun Benjamin Romero, autor di e buki ‘E Negoshi di Koffie na Aruba’ y kende tabata un di e promenan pa tira un bista den e buki aki ta comenta: “Conoce Bo Isla ta wordo presenta den un forma creativo. Asina nos tur, specialmente nos muchanan y hobennan, por siña hopi mas di nos pais di un forma agradabel y dibertido. E sorto di actividad aki di busca palabra ta un bon ehercicio pa nos mente, pues e por bira un ehercicio practico pa nos adultonan tambe”.
Un y tur ta keda invita. Diabierna anochi tin oportunidad pa cumpra e prome edicion di e serie ‘Conoce Bo Isla’ na biblioteca na Playa.
