A base di e deklarashonnan di señor Anthony Weber tokante e plan pa seniorenregeling, M21 ke duna un splikashon mas amplio. Nos ta haña di gran importansia pa no surgi ningun mal komprondementu tokante ehekushon di e plan akí.
Entidat Públiko Boneiru (OLB) no a desviá for di e palabrashonnan. Al kontrario, OLB a aktua korektamente i a ehekutá e palabrashonnan manera a keda establesé por eskrito ku e sindikato ABVO na 2022. E palabrashonnan akí a keda konfirmá den e akuerdonan individual di terminashon di servisio ku OLB i e anterior ámtenarnan di Grupo 3 a firma na yanüari i febrüari di 2023.
Den su deklarashon, señor Weber a referí na e konseho ku e, komo un di e konseheronan di OLB te ku 2023, a duna. E konseho akí a enserá ku e ámtenarnan di Grupo 3 lo a firma e akuerdonan na 2024. Di e manera akí, ainda lo por a inkluí e negosiashonnan di CAO ku tabata andando i nan lo a konta tambe pa e trahadónan menshoná.
Sinembargo, Kolegio Ehekutivo di e tempu ei a disidí otro. Nan a invitá e ámtenarnan di Grupo 3 for di yanüari i febrüari 2023 kaba pa firma e akuerdonan. Debí na e echo ku e fecha di referensia den e Seniorenregeling tabata stipulá riba e fecha di firmamentu, e konsekuensia tabata ku e ámtenarnan no por a reklamá nan derecho mas pa loke ta trata e adaptashonnan den e CAO nobo ku a drenta na vigor na 2024.
M21 ta enfatisá ku despues di firmamentu di e akuerdonan ku e ámtenarnan di Grupo 3, Entidat Públiko Boneiru ni Kolegio Ehekutivo NO a desviá di loke a keda stipulá den e Seniorenregeling, ni di e akuerdonan individual.