Recientemente un critico a duna un opinion “di bom” riba nos economia. Lamentablemente e
critico aki cu no ta un economista, ta afilia na partidonan opositor y deliberadamente a exclui
rapportnan di instancianan financiero/economico manera Banco Central di Aruba, EBA,
(Economisch Bureau Amsterdam) y CAft mes. Esaki ta un fayo mortal, mirando cu nan
rapportnan ta esencial si e kier tin credibilidad.
Banco Central di Aruba ta rapporta cu crecemento economico fuerte a tuma lugar 2023-
2024. E “critico” aki ta lansa varios preguntanan cu intencion pa crea suspenso y disgusto bao
pueblo. Riba 25 di Februari Banco Central a saca su publicacion di e “State of the Economy” pa
e prome 9 lunanan di 2024, den cual nos por constata un biaha mas cu economia di Aruba a crece
fuertemente cu 7.8%! Rapport di BCA ta mustra esaki claramente y por ser lesa riba nan website:
https://www.cbaruba.org
Gobierno: A duna bek pa subi poder di compra y duna alivio social. E pregunta di e “critico”
ta lubida cu tabata tin un pandemia y con Hulanda a pone nos “sector di salud” bao presion
enorme; mester a economisa 60 miyon pa aña! Sinembargo, pueblo sa un tempo caba cu nos
economia a “bons bek” milagrosamente pa asina Gabinete Wever-Croes por a cuminsa duna bek
na pueblo for di 2023. Algun hecho; – A duna indexering na ambtenaar 11.7%,
loonbelasting/inkomstenbelasting pa esnan di 1986-5000 florin pa luna a baha, a baha Premie di
AZV pa pensionado cu mas cu 50%, a aumenta pensioen cu 400 florin, a aumenta
reparatietoeslag cu 100 florin pa pensionado, reparatie toeslag a subi cu 75 florin, bijstand pa
esnan special a subi cu 180 florin y mas…
SVB y AZV ta aumenta fondo di reserva pa “dubbele vergrijzing.” E institutonan di SVB y
AZV no ta pa genera ganashi pero si a bin ta traha responsablemente pa crea fondonan di reserva
pa e “dubbele vergrijzing” cu lo tuma lugar pronto. AZV y SVB ta haci esaki pa sigura cu lo tin
suficiente placa den fondo pa por sigui cubri e cantidad creciente di pensionado cu lo bira dobbel
dentro di algun aña. Riba recomendacion di CAft a crea e “reservanan” aki, y a zorg pa fondonan
continuamente mester wordo aloca pa solidificanan.
CAft: Debe y Interes di pais Aruba ta riba bon caminda! Ora bo ta critico e ta importante pa
bo lesa rapportnan manera esun di CAft, cual repetidamente ta keda señala cu Aruba ta riba un
caminda solido di recuperacion y a exigi pa Aruba yega 70% di debe/GDP pa 2029 pero en
realidad nos a yega 71% na 2024 caba. Contrario na Mike Eman, Gabinete Wever-Croes a traha
duro pa rescata nos pais di e megadebe cu ainda tin 20 aña mas pa paga, a mustra curashi y
liderasgo durante pandemia, y a demostra grandesa cambiando e crisis financiero extremo di
2020-2022 den un crecemento y boom economico historico. Ademas, Gabinete Wever-Croes a
yega un areglo cu CAft pa loke ta jaarrekeningnan certifica, mientras Parlamento ta hayando tur
documento di presupuestonan supletorio, y comentarionan di CAft pa por controla unda cada
florin di nos fondonan publico a bay. Preocupacion grandi mi tin ora e “critico” ta bisa cu
Gobierno ta keto riba loke ta e debe y interes cual e ta considera un bom pa Aruba, mientras cu
semper gobierno a duna informacion transparente atraves di ruedanan di prensa riba e topiconan
aki. Adicionalmente, ta bon pa remarca cu e eliminacion di e RAFT y e introduccion di un
“hybride rijkswet,” cual lo bay regla refinanciamento di un gran parti di e megadebe na 3.4%, lo
baha e presion di interes y debe riba nos presupuesto. Pesey mi ta convenci cu Aruba tin
speransa, un fundeshi fuerte cu Gabinete Wever-Croes a laga atras pa Aruba por sigui lidera
Caribe den recuperacion economico y inversion social pa nos pueblo.