Despues di un reunion extenso den Parlamento, Parlamento di Aruba a aproba e Presupuesto 2026 di Pais Aruba. Lider di fraccion di Movimiento Electoral di Pueblo (MEP), Evelyn Wever-Croes, a expresa su satisfaccion cu e presupuesto a wordo aproba.
Segun Wever-Croes, e aprobacion di e presupuesto tambe ta confirma cu e bon maneho financiero durante e gabinete Wever-Croes I y II a crea un fundeshi solido, permitiendo cu e actual gobierno di AVP–FUTURO tin espacio pa implementa nan proyecto y vision. E lider di fraccion a destaca cu e estabilidad financiero logr’a den e periodo anterior a haci posible pa e gobierno actual papia di inversion y desaroyo.
Wever-Croes a indica cu e disciplina financiero aplicá door di MEP durante su gobierno a estableci un base cu e pais por sigui construí riba dje. Segun dje, e echo cu awe tin continuidad den diferente proyecto ta un indicacion cu e maneho financiero anterior a wordo haci cu responsabilidad.
Den e contexto aki, e lider di fraccion a expresa su agradecimento na ex minister di Finansas, Xiomara Maduro, y su equipo di profesionistanan di finansas, DIMP y legislacion, pa nan contribucion den fortalecé e posicion financiero di Aruba. Segun Wever-Croes, e decisionnan corecto tuma den e pasado ta produci resultado positivo awe.
“Si e trabou financiero no a wordo haci na e momentonan ey, ningun gobierno lo tin espacio pa presenta proyecto ni vision,” segun Wever-Croes.
E lider di fraccion di MEP a conclui cu e trabou realiza door di su partido a sinta un fundeshi fuerte pa e gobierno di turno y pa gobiernonan futuro. Tambe a señala cu varios proyecto incluyí den e Presupuesto 2026 ta proyecto inicia door di MEP, cu ta sigui adelante, algo cu, segun dje, ta digno di apreciacion.