Mientras hopi atencion ta wordo poni riba e cifranan macro-economico di Pais Aruba, e letra chikito di e Rijkswet HOFA (Houdbare Overheidsfinanciën Aruba) ta sconde un cambio radical den e manera con e entidadnan semi-publico lo wordo maneha. E tempo unda Gobierno por a uza NV-nan y fundacionnan como un “caha di emergencia” pa tapa buraco presupuestario, ta yegando na su fin.
E documento legal cu a keda presenta den fase di concepto, ta extende e brasa di supervision hopi mas leu cu e ministernan na Oranjestad. E control structural cu Hulanda ta exigiendo via e Ley di Reino aki, lo tin consecuencianan directo pa directivanan di NV-nan manera SETAR, WEB y Elmar, como tambe pa fundacionnan grandi manera AZV y SVb.
E concepto di “Sector Colectivo”
E cambio fundamental ta sinta den e definicion di “Sector Colectivo”. Bou di e reglanan di HOFA, e finansa di e fundacionnan y e entidadnan publico ta wordo conta como parti integral di e cuentanan di Pais Aruba. Esaki nifica cu si un fundacion tin un deficit inespera, esaki ta wordo conta automaticamente como un fayo di e Pais completo pa cumpli cu e normanan di e Rijkswet.
E meta ta pa elimina e asina yama “creative accounting” (contabilidad creativo), unda Gobiernan tabata por a sconde gasto of debe fuera di e presupuesto central pa asina presenta cifranan mas faborabel na Parlamento.
Fin di e “Dividend-stripping”
Un di e practicanan mas uza den decadanan recien ta e pidi di dividendonan extra of “special” for di companianan estatal ora caha di Gobierno ta bashi. E Rijkswet HOFA ta bin pa pone un freno riba esaki.
- Previsibilidad: E ley ta stipula cu entrada di dividendo mester ta structural y planifica.
- Proteccion di Inversion: E Begrotingskamer lo bay vigila si e retiro di placa pa Gobierno ta pone e salud financiero y e capacidad di inversion di e NV-nan mes na peliger. Pa e ciudadano, esaki por nifica un miho garantia cu e placa di e companianan aki ta keda pa mantencion y inversion den servicio (manera awa y luz), en bes di bay pa paga gasto coriente di aparato gubernamental.
Control riba Fiansa y Deber di Raportahe
Un otro punto cu ta bay mishi cu e autonomia di e entidadnan aki ta e capacidad pa fia placa riba mercado internacional. Bou di e framework nobo:
- Lening-plafond: Tur fiansa grandi di NV-nan of fundacionnan lo mester keda evalua pa e Begrotingskamer pa sigura cu nan no ta afecta e posicion di debe nacional di Aruba.
- Transparencia Absoluto: E obligacion pa entrega cuenta anual y cifranan trimestral ta bira hopi mas strictu. Si un fundacion grandi faya den su raportahe, esaki por causa un “check cora” pa e Pais completo den e Conseho di Minister di Reino (RMR). Sinembargo te dia di awe e companianan estatal aki ta den bon status.
Conclusion: Un Autonomia bou di Lupa
E Rijkswet HOFA ta crea un muraya transparente rond di e sector publico y semi-publico. Maske esaki por wordo mira como un paso positivo pa transparencia y integridad financiero, e ta nifica tambe un reduccion den e flexibilidad politico di e mandatarionan local.
Den Haag awor no solamente ta vigila e presupuesto di e Ministernan, sino cu nan tin un bista directo den e “cashi” di tur e instancianan cu ta carga e economia di Aruba. Pa e periodismo di investigacion, esaki ta habri un porta nobo pa monitor con e tension aki entre autonomia comercial di e NV-nan y e exigencianan di e Rijkswet lo bay hunga den e añanan binidero.
Cu esaki tambe por bisa cu no ta solamente e autoridad di Parlamento y Gobierno Hulanda a bin impone riba dje, pero tambe den tur e identidadnan y tur e placa cu Aruba den tur fundacion y of companianan estatal cu tin di haber cu Aruba su entrada, Hulanda lo por dicidi kico nan lo tin deseo pa haci cu e placa cu Aruba ta genera.
Esaki ta loke Aruba a vota pe ? esaki ta loke tabata e deseo di Pais Aruba realmente den e rumbo cu kier a bay, abo a vota pa politiconan di AVP –FUTURO pa perde bo autonomia?
Analisis: E analisis aki ta basa riba e “Concept Voorstel van Rijkswet HOFA” cu a keda registra oficialmente pa e aña legislativo 2025-2026.