Dialuna 12 di mei, Minister di Salud Publico Mervin Wyatt-Ras, a haci un bishita oficial na SVb Eagle y Sun Plaza, na unda ir. Edwin Jacobs, director di SVb, a duna e mandatario un presentacion di funcionamento di cada seccion den e organisacion di e banco di seguro social. Na e ocasion aki, Minister a cera conoci tambe cu e personal di SVb cu tin e tarea importante pa duna e calidad di servicio desea na cada cliente.
A funda SVb den añanan 50 como banco social y desde nos Status Aparte tin su propio identidad. E meta di SVb ta pa evita pobresa den comunidad y ta responsabel pa paga pension na nos grandinan, ta paga uitkering di vuido(a) y huerfano, pero tambe ta cubri e parti di salario di esnan cu ta temporalmente incapacita na trabao. SVb ta genera fondo pa medio di contribucion di impuesto di Algemene Weduwen- en Wezenwet (AWW) y Algemene Ouderdomsverzekering (AOV).
Gobierno di AVP-Futuro, basa riba e situacion financiero positivo di SVb, recien a duna un aumento di 250 florin di reparatietoeslag na cada pensionado pa yuda mehora nan poder di compra. Pa Minister Wyatt-Ras, ta crucial pa tin bon bista riba e fondonan di SVb, pa por garantisa continuidad di e servicio importante aki, principalmente pa nos grandinan. Gobierno tin compromiso cu nos grandinan, cu ta esnan cu a construi e Aruba cu awe nos ta gosa di dje.
Den siman Minister Wyatt-Ras lo bishita SVb su sucursal na San Nicolas como tambe e departamento di pensioen na Vondellaan.