En konekshon ku e mensahe kompartí anteriormente tokante hèrmènt i ekiponan di konstrukshon ku a topa durante un entrada hudisial na Boneiru, Kuerpo Polisial Hulanda Karibense ta anunsiá ku lo tin un último oportunidat pa mira esakinan djaweps benidero, 14 di mei.
Nos ta hasi un yamada un biaha mas na kualke persona ku ta sospechá ku nan ta doño di (un di) e ekiponan ku a haña, pa pasa na warda di polis na Kaya Libertador Simon Bolivar #4, entre 2 or di atardi i 4 or di atardi.
Por fabor trese un resibu òf un prueba ku bo ta doño. Sin e prueba aki nos no por duna ningun ekipo.
Bo a mira algu sospechoso? Yama 717 8000 òf e liña di tep anónimo 9310.