Den declaracionan conhunto publica ayera di 7 di augustus pa Departamento di Husticia Americano y Departamento di Estado Americano, e Procurador General di Estados Unidos Pam Bondi a aumenta e recompensa pa captura di Nicolas Maduro. E recompensa a wordo aumenta di US$ 25 miyon pa US$ 50 miyon y segun e P.G. , Maduro ta uza e organisacion Mexicano Cartel di Sinaloa, Tren de Aragua y Cartel de los Soles pa trece droganan mortal y violencia den e pais Mericano. E tres organisacionnan ariba menciona ta cay den categoría di gruponan terorista.
Según e mandatario, Estados Unidos a decomisa 30 tonelada di droga conecta cu e organisacionnan y 7 tonelada cu segun e PG por wordo conecta directamente cu Maduro.
E mandatario a subraya cu cocaina ta loke ta wordo mezcla cu fentanilo y esaki tin como resultado un perdida anual di mas di 100 Mericano. E mandatario a sigui declara cu nan a confisca mas di US$ 700 miyon dollar di propiedadnan di Maduro e.o. 2 avion cu a wordo confisca ( red. 1 na Argentina y 1 na sto domingo)
Segun declaracionnan cu e mandatario a publica ariba su cuenta di X (twitter) e la declara cu segun e y su gobierno, Nicolas Maduro ta e traficante di droga mas grandi na mundo, surpasando Pablo Escobar y el Chapo Guzman y cu e acusacion aki tambe ta considera Maduro como un menaza pa siguridad nacional Mericano. Uzando e argumento aki, Departamento di Husticia Mericano a dicidi di redobla e recompensa di $ 25 miyon pa $ 50 miyon pa informacionan cu por conduci na captura di Maduro. Segun e mandatario ainda e ‘reino di terror’ di e regimen ta continua, pero bao mandato di Donald Trump, e traficante-dictador Maduro lo no scapa husticia y e lo wordo haci responsabel pa tur e crimenan cometi.
Pa finalisa e PG ta pidi si abo tin información pa trece dicho criminal dilanti husticia ,yama e siguiente number : 1-202-307- 4228 of bay e website di DOJ pa entrega bo keho, tuma nota cu e informacionnan mester conduci na aresto di e Presidente Venezolano.
Ta importante pa remarca cu Estados Unidos y Venezuela pa basta aña caba no tin ningun tipo di relacionnan diplomatico y cu segun cifranan di DEA, Colombia ta e pais cu ta produci mas cocaina na mundo. Ainda no a scucha reaccion di e mandatario Venezolano.
Ahunto Link di e declaracionan.