Minister Geoffrey Wever: bahada di accijns ta mitiga subida di prijs di gasolin y diesel den mei

Minister di Finansa, Asunto Economico y Sector Primario
Geoffrey Wever ta informa cu entrante 13 di mei 2026 prijs di gasolin lo bira Afl. 2,65
pa liter y prijs di diesel lo bira Afl. 2,57 pa liter. E bahada di accijns pa mitiga e subida
drastico di prijs di petroleo y productonan petrolero ta incorpora den ambos prijs. Sin
e decision di Gabinete AVP-FUTURO pa accijns riba gasolin y diesel desde 8 di april
2026, e consumidor lo mester a paga Afl. 2,89 pa liter di gasolin y Afl. 2,95 pa liter di
diesel.
Calculacionnan di Departmento di Asunto Economico, Comercio y Industria ta
mustra cu entrante 13 di mei prijs pa liter di gasolin lo conoce un cambio di Afl. 2,48
pa Afl. 2,65 cu ta igual na un subida di 17.2 cent pa liter (+6.9%). Prijs pa liter di diesel
lo conoce un cambio di Afl. 2,47 pa Afl. 2,57 cu ta igual na un subida di 10.5 cent pa
liter (+2.6%). Prijs di liter di kerosin lo subi di Afl. 2,94 pa Afl. 3,02, un subida di 7.6 cen
(+2.6%).
E postings, e prijs averahe pa luna di april como componente den e structura di prijs,
ta mustra un subida compara cu maart. E subida den prijsnan internacional pa
productonan petrolero ta traduci automaticamente den un subida di prijs na Aruba.
Manera anuncia den luna di april, Gabinete AVP-FUTURO ta absorba mitar di e
subida aki. Esaki ta encera cu a baha temporalmente accijns riba gasolin cu 21,2 cen
pa liter. Accijns riba diesel a wordo kita completamente, di 33,2 cen pa 0 cen pa liter.
E bahada di accijns ta costa pa dos luna 5,1 miyon florin. Pa cubri esaki, Gabinete
AVP-FUTURO den un esfuerzo collectivo a crea e espacio financiero y a crea e buffer
necesario pa asina absorba e subida drastico di prijs internacional di productonan
petrolero.
Aborba e impacto di guera ta den liña cu Programa di Gobernacion 2025- 2028. Meta
di maneho economico manera indica riba pagina 36, ta baha prijs di gasolin y diesel
door di reduci accijns.
Gabinete AVP-FUTURO ta sigui monitor e efecto di prijsnan internacional di
productonan petrolero riba prijs di gasolin y diesel pa consumidor y lo comunica na
tempo cualkier decision pa mitiga esaki dentro di e cuadro financiero y cumpli cu e
norma di presupuesto manera ley ta bisa. Decision pa habri e Estrecho di Hormuz ta
un factor determinante riba e desaroyo y volatilidad diario den e prijs di petroleo.