Den cuadro di su maneho pa busca cooperacion cerca municipionan na Hulanda, Minister Plenipotenciario mr. Ady Thijsen a haci un bishita na burgemeester di Almere Hein van der Loo. Van der Loo na luna di maart ultimo a keda nombra como burgemeester di Almere, pa reemplasa burgemeester interino Ank Bijleveld, kende a tuma e encargo despues cu Franc Weerwind a bira minister den Gabinete Rutte IV.
Den su introduccion Minister Thijsen a trece dilanti su vision y maneho pa haci Aruba mas visibel na Hulanda. No solamente na Den Haag, unda e Gobierno di Hulanda ta sinta, pero tambe cu e municipio y provincianan. Tambe bon contacto cu Hogescholen, Universidad y comercio ta importante. E mandatario a bisa cu cada municipio tin nan tereno specifico cu kisas por coopera riba dje.
Burgemeester Van der Loo den su introduccion a bisa cu Almere ta un ciudad hoben cu ta conta cu 223 mil habitante. E pronostico ta pa Almere crece na 350 mil habitante. E poblacion di Almere ta hopi diverso y ta conta cu persona di diferente origen etnico. Almere a cuminsa como un ciudad satelite di Amsterdam, unda hendenan ta traha na Amsterdam, pero ta biba na Almere. Den trancurso di aña Almere a atrae hopi compania y industria, manera Yanmar y Yacult di Japon y tambe ASM International.
Den e combersacion a papia di posibilidad di estudio na Almere y e problematico di vivienda pa studiante na Almere. Burgemeester Van der Loo a bisa cu Hogeschool Windesheim ta brinda diferente estudionan y tambe cu e scol ta den tramite pa expande y traha un campus grandi pa studiante. Segun sr. Van der Loo lo mester sondea posibilidad cu esaki por trece cune pa studiantenan for di e parti Caribense di Reino, pasobra mescos cu otro parti di Hulanda, Almere tambe tin scarsedad di camber pa studiante.
Minister Thijsen a menciona cu tambe e ta busca formanan di cooperacion pa e sector agricola di Aruba y tambe na maneranan pa stimula y sostene entrepreneurnan na Aruba. Segun e mandatario tin hopi hoben cu kier cuminsa cu nan mesun negoshi.
Burgemeester Van der Loo a bisa di tin hopi simpatia pa e manera di pensa di Minister Thijsen y cu elo bai sondea terenonan unda cu Almere y Aruba por coopera cu otro. Minister Thijsen a gradici e burgemeester pa esaki y pa e bon recepcion, pa despues intercambia regalo como recuerdo di e bishita di minister Thijsen na e burgemeester di Almere.
