Awe dia 15 di mei rond mundo ta celebra dia di famia. Parlamentario Mervin Wyatt-Ras ta expresa palabra di aprecio na tur famia aki na Aruba. Na anja 1993 e dia aki a ser declara dor di Nacionnan Uni como un dia internacional di celebracion y refleho ariba e importancia di famia.
E tema di e anja aki ta famianan y urbanisacion pa concientisa e importancia di maneho sostenible y family friendly cu ta relata na SDG’s y metanan manera SDG 1 pa elimina pobresa, SDG 3 pa bon salud y bienestar general, SDG 11 pa haci comunidad inclusivo, cu seguridad, resiliente y sostenible y SDG 10 pa reduci desigualdad dentro y entre paisnan.
Segun Wyatt-Ras nos comunidad ta consisti di famianan solido. Nos ta convivi un cu otro y apesar di cambionan den constelacion familiar y individualisacion, nos famianan a sa di comparti y yuda otro especialmente durante e tempo dificil di COVID. Dor perdida di empleo di mayornan den famia y retonan financiero, por constata aumento di problemanan laboral, di pareha, violencia, abuso, maltrato, depresion, adiccion tambe criminalidad. Nos hendenan tin mester sosten pa por sali for di debe y pa cumpli cu primera necesidad.
Lamentablemente por constata cu na Aruba apesar di miyones di florin cu Staten a aproba, gobierno no a logra yuda esnan den necesidad lo suficiente. Ta ser experencia cu pobresa a aumenta mas y cu e medidanan cu gobierno lo introduci y cu lo ser sosteni dor di RAft y COHO lo aumenta dicho pobresa y trese mas desigualdad den nos comunidad. E poder di compra di nos ciudadanonan lo baha mas cu introduccion di BTW y dor di e reforma laboral dor di cual lo por kita trahado mas facil. Dor di medidanan den cuido saliendo for di e landspakketten y reforsa dor di RAft y COHO, nos ciudadanonan lo bai haya menos medicinan y lo mester bai paga pa tur tipo di servicio medico locual lo trece cune mas division entre ciudadanonan y cuido di clase (klassezorg). E desigualdad entre nos pais y especialmente madre patria lo bira mas grandi ainda enbista di e Rijkswetten RAft y COHO cualnan lo haci cu nos pais cu semper a para riba propio pia lo bira dependiente di gobierno y Parlamento Hulandes, sin cu nos Parlamento y gobierno lo por eherce nan trabou debidamente.
Den caso no ta di acuerdo cu algo mester bai te Hulanda.
Pues e metanan di SDG’s indica dor di Nacionnan Uni lo no ta alacansabel pa Aruba. Mas y mas e metanan aki lo bira dificil pa logra.
Esaki sigur lo tin mas impacto ariba e situation financiero di nos famianan y lo trece cun’e mas inseguridad familiar, stress y descontento, cualnan lo tin impacto ariba nos futuro generacion. Ta urgente cu nos pais por pone mas atencion ariba nos famianan y nan bienestar prome cu tuma cualkier decision. Esaki ta un preocupacion grandi pa Wyatt-Ras y partido AVP. Manera tur otro pais den mundo nos tin cu orienta nos mes ariba bienestar di henter comunidad. Ariba e dia aki pues tin cu realisa cu nos tin un batalla pa hiba pa por garantisa bienestar, salud y futuro di nos famianan.