ORANJESTAD /ARUBA, Dia 6 di januari 2025, Aruba a despedi di Aruba su prome Minister President sr. Henny Eman. Awe riba e mesun fecha, pero un aña despues, Gabinete AVP-Futuro, riba
peticion di Stichting Henny Eman, a honra un visionario grandi den politica di Aruba
nombrando un di e careteranan principal di Aruba na su nomber. Awe parti di e
caminda conoci pa decada como L.G. Smith Boulevard cu ta inicia na e retonde di
Mahuma te cu e retonde di Sun Plaza, ta bira oficialmente Henny Eman Boulevard. E
caya largo aki ta pasa dilanti di Aeropuerto Internacional Reina Beatrix, dilanti di
Parlamento di Aruba y e oficina principal di Gobierno di Aruba y conecta cu e area di
turistico principal cu tabata parti di e vision di Henny Eman.
Durante di e atardi di e desvelo, tambe a tuma luga un ceremonia den cual
ehecutivonan di Aeropuerto Reina Beatrix a compaña Prome Minister Mike Eman y
Minister Wendrick Cicilia plantando dos mata di Wayacá Macho riba e "berm" net pabao
di e retonde di aeropuerto como parti di e plan nacional di reforestacion "Sembra
Speransa". Hunto cu e desvelo di nomber di Henny Eman Boulevard, ta honra nos
liderazgo y duna balor na nos biodiversidad y futuro.
Minister mr. Wendrick Cicilia a remarca di ta un momento pa celebra y honra e
gigantenan y lidernan cu a cana hunto cu nos. “Porta di shelo ta habri pa hende homber
y muhe cu ta dedica na pais; nos sa cu minister-president Henny Eman, Nos MinPres,
Nos Henny Eman! Awe ta mira for di shelo y sumamente contento” Minister Cicilia a
remarca tambe den su discurso diferente vision y logronan cu Aruba su prome prome
minister a logra.
Presidente di Stichting Henny Eman, sr. Tico Croes a hiba palabra diamars atardi
tambe durante e develo di e borchi di Henny Eman Boulevard. Sr. Croes a comparti cu
tur presente cu no por lubida con Henny Eman a enfrenta varios reto den nos turismo.
“Henny a convence pueblo, pa den tres luna , pueblo haci un esfuerso di bay un banco;
entrega e Florin Antiano y busca un florin Arubiano” Sr. Croes, cu tambe a fungi como
minister den Gabinete Eman II y Eman III a cataloga esaki como un muestra con un
lider ora e ta visionario, ora e por convece su comunidad cu e por cambia e motivacion
individual pa motivacion y accion colectivo.
James Hepple, un experto den turismo na Aruba a repasa varios cifranan di nos turismo
durante e ultimo decadanan “Lidernan manera Henny Eman no ta maneha djis
economia, pero nan ta re-imagina e intensidad di nos isla.” Sr. Hepple a remarca pa
nos sigui enfoca riba turismo y tuma tur accion necesario pa garantisa nos turismo sigui
florece.
Minister-president mr. Mike Eman a comparti varios anectoda durante e bahada di solo
despues cu e devela e borchi di Henny Eman Boulevard. “Awe si nos por disfruta di nos
turismo ta Danki na Henny Eman su vision” Henny Eman como prome minister a
declara 30% di Aruba como parke nacional, asina visionero Henny Eman tabata no
solamente den e aspecto economico pero tambe den e identidad di kico ta mara nos
n’e suelanan aki.
Tocante Henny Eman, Aruba su prome minister-president
Henny na edad hoben studiando na Hulanda, a tuma e responsabilidad pa wak pa
su mama y su rumannan na Aruba, ora su tata a fayece diripiente y a laga su famia
man
bashi. Cu apenas 28 aña, Henny a bolbe Aruba pa rebiba e partido di Pueblo Arubano,
AVP, no na cabez di e partido, pero si como e lider politico nobo y inspirado, y a logra
pone e
partido crece y bira e di dos partido mas grandi na Aruba den e añanan turbulento y
crucial pa nos pais, na vispera di Status Aparte.
Den e ultimo fase prome cu Aruba a logra Status Aparte, el a hunga un rol hopi
importante. Henny a encabesa e campaña hunto cu un grupo grandi di hoben na 1985
y despues pa “RESCATA” nos pais y dun’e speransa den un Aruba Nobo, despues cu
refineria LAGO a cera. Ora hopi hende aki na Aruba y den exterior no a wak futuro pa
Aruba sin e refineria y miles di hende y compania a bandona nos pais pa bay busca un
futuro den exterior, Henny a motiva hende pa yuda reconstrui Aruba y crea e Aruba
Nobo cu awe ainda nos ta biba aden.
Henny a bira e prome Minister President di Aruba cu su Status Aparte na 1986 y
a traha cu alma y cuerpo pa duna Aruba un otro rumbo, apesar di tur e retonan cu nos
pais chikito mester a enfrenta pa sobrevivi y varios conseho negativo pa loke el a fiha
como meta pa Aruba: un Aruba Nobo cu ta bon pa nos tur! Un Aruba cu su propio
moneda apesar di ainda e no tabata tin un economia pa sobrevivi; un Aruba cu su
propio Gobernador, su propio cuerpo di polis y aduana, su propio gobierno y aparato pa
sirbi nos pais.
Den e añanan cu a sigui bou di liderazgo di Henny, a cuminsa construi e industria di
turismo cu den poco aña a crece bira un di e destinacionnan mas gusta den Caribe.
Aruba tabata bek riba su pianan. Henny a traha hunto cu Sr. Mito Croes dfm, Sr. Tico
Croes y Sr. Watty Vos dfm na e documento cu a haya e nomber di “Doño di nos propio
destino”, cu cua a logra convence Hulanda pa saca e fecha di independencia di Aruba
na 1996 for di Statuto cual acuerdo Henny, hunto cu lider di MEP sr. Nelson Oduber a
firma na Den Haag.
Den añanan 90 Henny, Manchi Engelbrecht dfm, Sr. Watty Vos dfm, Sr. Mito Croes
dfm,
Sr. Tico Croes y hopi di e hobennan cu a cuminsa e RESCATE di Aruba na 1985, a
embarca riba loke tabata e meta real di Status Aparte: crea un miho calidad di bida pa
tur hende. Mescos cu a crea e Fiansa pa Estudio pa duna tur hoben – independiente di
e
color politico di nan mayornan y independiente di entrada di nan mayornan – e
oportunidad pa sigui studia na Aruba, Hulanda, Merca of den otro paisnan reconoci.
Henny y su team a scoge pa haci algo cu te awe poco pais na mundo a realisa: un
seguro medico cu lo sigura tur hende, independiente di nan color politico, nan posicion
den comunidad, independiente si nan tin trabou of no. Henny a crea e SEGURO
MEDICO GENERAL AZV.
Ademas Henny a bira conoci pa e redoblamento di e pensioen di biehes na 1994. Pero
ta e introduccion di AZV a bira e legado principal di Henny.
Esaki tabata e miho expresion di e filosofia di BON COMUN cu nos pais a yega di
conoce. E tabata e forma di haci cosnan hunto y pa otro den forma organisa y
institucionalisa. Mescos cu e creacion di e FIANSA PA ESTUDIO, AZV a nifica cu
ningun hende na Aruba tin cu depende di ningun fabor politico pa por bay studia of
haya cuido medico.
E vision di e ARUBA NOBO ta un Aruba cu ta bon pa nos tur, cu ta wak pa nos tur, cu
ta duna tur oportunidadnan igual y cu ta kita e dependencia di fabornan politico. Den e
Aruba cu a bira “Baas den su Cas”, cada Arubiano y habitante di Aruba, mester ta liber
pa scoge su destino cu apoyo di su pais!
