Minister di Husticia, Integracion, Transporte Publico y Energia, mr. drs. Arthur Dowers, a dirigi palabra na Nacionnan Uni na New York den nomber di Reino Hulandes, durante e reunion di alto nivel pa conmemora 40 aniversario di Declaration on the Right to Development.
E reunion ta forma parti di e actividadnan di alto nivel durante di 81 sesion di Asamblea General di Nacionnan Uni y ta marca 40 aña desde cu Asamblea General a adopta e declaracion na 1986. E declaracion ta reconoce derecho na desaroyo como un derecho humano cu no por wordo kita y ta pone enfasis riba participacion, igualdad di oportunidad y cooperacion internacional.
Durante su discurso, Minister Dowers a enfatisa cu derecho na desaroyo ta conecta directamente cu diferente derechonan humano y cu desaroyo sostenibel mester inclui tanto derechonan civil y politico como derechonan economico, social y cultural.
“The right to development is a symbol of the indivisible, interdependent, and mutually reinforcing nature of all human rights.”
Minister Dowers a señala cu Agenda 2030 ta keda e guia internacional pa desaroyo sostenibel, pero cu conflicto, cambio climatico y desigualdad creciente ta pone
presion riba e progreso logra te awo.
Den su discurso, el a reafirma e compromiso di Reino Hulandes cu Agenda 2030 y a subraya cu Aruba, Curaçao, Sint Maarten y Hulanda, cada un for di nan propio contexto, ta traha cu un meta comparti: un futuro husto, inclusivo y sostenibel.
“Aruba, Curaçao, Sint Maarten and the Netherlands work in their own context, with one shared goal: a just, inclusive and sustainable future.”
Un otro punto importante den e discurso tabata cooperacion. Minister Dowers a enfatisa cu ningun pais por logra desaroyo sostenibel su so y cu e principio di cooperacion entre paisnan ta forma un parti importante di e Declaration on the Right to Development.
Tambe el a anuncia cu Reino Hulandes lo presenta su di tres Voluntary National Review tocante progreso riba Sustainable Development Goals (SDGs) otro aña. E proceso lo conta cu participacion di hobennan, sector priva y sociedad civil, pa asina refleha e SDGnan como un agenda comparti.
Minister Dowers a expresa ademas sosten di Reino pa procesonan di reforma cu tin como meta haci Nacionnan Uni mas representativo, resiliente y efectivo pa enfrenta e retonan actual.
Na final di su discurso, Minister Dowers a haci un yamada pa e 40 aniversario no ta solamente un momento pa wak bek, sino tambe pa renoba compromiso cu e futuro:
“Let the 40th anniversary of the Declaration remind us of our common goal to ensure that every person has the ability to shape their own future.”
Participacion di Minister Dowers na e reunion di alto nivel ta forma parti di su programa na New York durante High-Level Week di Asamblea General di Nacionnan Uni, como parti di delegacion di Reino Hulandes.
