Riba djamars 4 di yüni den reunion di komishon di Konseho Insular a
deliberá tokante un proposishon di Kolegio Ehekutivo pa kambio di e Ordenansa di
Impuesto di Turista 2022. Dia 11 di yüni ta trata e proposishon akí den e reunion di
toma di desishon di Konseho Insular.
Rapòrt di evaluashon
Aña pasá tabatin entrega di un rapòrt di evaluashon ku proposishon pa hasi
kambio den e Ordenansa di Impuesto di Turista 2022. A trata e rapòrt akí dia 28 di
mart den reunion di komishon di Gobièrnu i Organisashon, kaminda a kontestá
pregunta i a inkorporá e deseonan di Konseho Insular.
Kambio
Den liñanan grandi e Komishon tabata di akuerdo ku e rapòrt di evaluashon i a
ekspresá e deseo pa laga shete di e kambionan proponé drenta na vigor mas
pronto posibel, di manera ku e gruponan di enfoke en kestion por probechá
mesora di esakinan den e vakansi grandi binidero.
Riba djamars 4 di yüni den reunion di komishon di Konseho Insular a trata e promé
tres kambionan prioritario ku nan a elaborá di e Impuesto di Turista. E fecha
stipulá tentativamente pa ehekushon di e kambionan akí ta 1 di yüli 2024. E
kambionan akí ta:
1. Un tarifa redusí di $10 pa tur yu di nos isla ku no ta biba na Boneiru.
2. Un eksonerashon pa tur studiante boneriano ku ta studia den eksterior.
3. Un balides prolongá di e impuesto te ku un (1) luna.
Reakshon di Konseho Insular
Dia 4 di yüni Konseho Insular a reakshoná positivamente riba e tres kambionan ku
nan a elaborá pa término kòrtiku, ku awor nan ta bai trata dia 11 di yüni den e
reunion di toma di desishon di Konseho Insular.
Tin algun kambio ainda ku nan a proponé, ku tin mester di mas tempu pa elaborá
esakinan konforme ehekutabilidat i faktibilidat hurídiko. Pa medio di dekreto insular
ta stipulá e fecha di vigensia di e kambionan akí.
Tur e kambionan menshoná ta kambionan intermedio, antisipando riba e revishon
general di e Impuesto di Turista, ku nan ta trahando pa logra riba término largu.
Kolegio Ehekutivo
Diputado Abraham ta indiká: ‘Kaminda mayoria di nos bishitantenan ta bini
Boneiru pa vakansi òf rekreashon, bishita di yunan di nos isla hopi biaha ta enfoká
riba bishita serka famia i regreso na nan propio isla. Ta hopi bon ku, manera nos
ta spera, promé ku vakansi grandi ya kaba nos por ofresé nan un tarifa redusí di e
Impuesto di Turista.’