Kòntròl di velosidat ku detenshon pa manehá bou di influensia
Den oranan di mardugá di djárason 24 di desèmber a tene un kòntròl di velosidat riba
Kaya Korona. Ku un ‘lasergun’ a midi velosidat di vehíkulonan aserkando. Durante e
kòntròl, a duna dos (2) but pa surpasá e velosidat máksimo pèrmití di 40 km/ora. E
velosidat mas haltu ku a midi ta 66 km/ora.
Banda di esaki a duna dos (2) shofùr but pa manehá sin seguro bálido i un(1) shofùr a
haña but pa manehá sin reibeweis bálido.
Alrededor di 3.45 or di mardugá, a detené un hòmber di inisial T.H.M.S. di 22 aña di
edat pa manehá bou di influensia di alkohòl. E sospechoso tabata mustra diferente
karakterístika di un persona ku a konsumí alkohòl, di kua a hasi un tèst di supla kuné ku
resultado positivo. A konsekuensia di e resultado di un análisis di rosea, a konfiská
reibeweis di e sospechoso.
KPCN lo kontinuá ku e tipo di kòntròl aki dirigí riba velosidat na diferente parti di nos isla
i ta atvertí tur outomobilista pa paga tinu riba nan velosidat. Den área urbanisá
(bebouwde kom), 40 km pa ora ta e velosidat máksimo permití i pafó di bebouwde kom
ta 60 km pa ora.
Detenshon pa buracheria públiko
Djamars 23 di desèmber, alrededor di 4.30 or di atardi, a detené un hòmber di inisial
G.L.M. di 63 aña di edat na Bulevar Miguel Pourier pa buracheria públiko. Pa kita
wayabá a hiba e sospechoso Instituto Hudisial Hulanda Karibense (JICN).
Detenshon pa ladronisia ku violensia
Djamars 23 di desèmber, alrededor di 2 or di atardi, a detené un hòmber di inisial
B.G.S. di 26 aña di edat na warda di polis. E detenshon di e sospechoso ta den kuadro
di un investigashon andando tokante un kaso di ladronisia ku violensia ku a tuma lugá
riba djasabra 20 di desèmber 2025. Investigashon den e kaso ta kontinuá.
Aksidente ku skuter
Djamars 23 di desèmber, alrededor di 2.25 or di mardugá, ‘meldkamer’ sentral a risibí
notifikashon tokante un aksidente ku skuter na Kaya J.N.E. Craane. Na yegada di polis
a resultá ku e shofùr a dal ku e skuter den un baki di mata. Ambulans a transportá e
shofùr pa hòspital pa tratamentu médiko.