Entrada hudisial ku detenshon
Djabièrnè 3 di òktober, alrededor di 6 or di mainta, e Grupo di Tarea Spesial (GBO) a hasi detenshon na un kas na Kaya Macario (Cai) Sint Jago. Durante di e entrada hudisial a detené un hòmber di inisial G.L.R.F. di 33 a. di 33 aña di edat pa menasa. A konfiská artíkulonan importante pa e investigashon. Investigashon ta kontinuá.
Aksidente entre skuter
Djaweps 2 òktober, alrededor di 9.20 or di anochi, ‘meldkamer’ sentral a risibí notifikashon tokante un aksidente entre dos skuter riba Bulevar Julio A. Abraham, di kua ámbos shofùr a resultá heridá. Na yegada di polis, e víktimanan tabata den ambulans i tabata risibí tratamentu médiko. No mester a transportá nan pa hòspital. E skuternan tabata kore tras di otro, di kua esun patras a dal den esun dilanti. Pa e motibu aki ámbos shofùr a kai. Nan tabata den poseshon di un reibeweis bálido i por a mustra dokumentunan di seguro bálido.
Detenshon pa manehá bou di influensia durante kòntròl di tráfiko
Den oranan di anochi di djaweps 2 di òktober a tene un kòntròl di tráfiko riba Kaya Korona. A kontrolá 16 vehíkulo di kua a duna butnan.
E butnan tabata pa e siguiente violashonnan:
1x pa surpasá e velosidat máksimo den área urbanisá ‘bebouwde kom’.
1x pa manehá sin reibeweis bálido.
Banda di esaki a duna un shofùr atvertensia pa manehá bou di influensia di alkohòl. Mirando e promilage di alkohòl ku e shofùr a supla, un otro persona por a kore e vehíkulo bai kas.
A detené un hòmber di inisial S.R.G.A. di 40 aña di edat pa manehá bou di influensia di alkohòl. El a haña un prohibishon pa manehá di 4 ora.
Lo tene e kòntròlnan aki regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Detenshon pa ladronisia i entrada hudisial
Djárason 1 di òktober, alrededor di 11.10 or di mainta, a detené un hòmber di inisial R.M.E. di 70 aña di edat na Kaya Adela pa ladronisia. E investigashon ta relashoná ku un investigashon andando tokante ladronisia na un kompania na Kaya Korona. Despues di e detenshon a tene un entrada hudisial den kas di e sospechoso. Aki a konfiská artíkulonan importante pa e investigashon. E investigashon ta kontinuá.
Ladronisia na bich
Djamars 30 di sèptèmber a drenta keho di ladronisia na Playa Pal’i Mangel (Donkey’s Beach), situá na E.E.G. Bulevar. Miéntras e doño tabata landa, deskonosínan a bai ku un tas ku kontenido ku a keda riba e bich. Den e tas tabatin entre otro un telefòn selular di e marka Samsung A23, dos brel di solo di e marka Ray-Ban i paña. Ta investigando e kaso.