Ménor di edat detené ku ‘fatbike’ hòrtá
Djaweps 29 di mei, alrededor di 5.45 or di atardi, a detené un menor di edat di 15 aña di edat di inisial R.R.K. riba Kaya Mohicano pa enkubrimentu. E detenshon a tuma lugá despues ku un patruya a mira dos hoben riba dos ‘fatbike’ i a para ámbos pa un kòntròl. Durante kòntròl a resultá ku un di e ‘fatbike’ nan ta prosedente di ladronisia. A hòrta esaki entre 10 i 11 aprel na Kaya Inglatera. A konfiská e ‘fatbike’ hòrtá.
Ladronisia di skuter
Djaweps 29 di mei, a drenta keho di ladronisia di un skuter koló pretu di marka Sym, modèl Fiddle, ku plachi di number MF-2301. E skuter tabata stashoná dilanti di un kas situá na Kaya Akwamarin.
Djárason 28 di mei, a drenta keho di ladronisia di un skuter koló ros i blou klá di marka AGM, modèl Retro, ku plachi di number MF-4430. E skuter tabata stashoná ku un lòk di stur dilanti di un kompleho di apartamentu situá na Kaya Niagara.
E kasonan ta bou di investigashon.
Detenshon pa maltrato
Djaweps 29 di mei, alrededor di 11.25 or di mainta, a detené un hòmber di inisial J.F.R.F. di 41 aña di edat na Kaya Flamboyan pa maltrato. Ta investigando e kaso.
Detenshon pa manehá bou di influensia
Djaweps 29 di mei, alrededor di 12.30 or di mardugá, a detené un hòmber di inisial C.J.P.I. di 37 aña di edat na Kaya Haldu pa manehá bou di influensia di alkohòl. E sospechoso a bèk i dal ku su vehíkulo den un outo ku tabata pasa na momentu ei. For di un tèst di supla a resultá ku el a konsumí mas alkohòl ku ta permití na momentu ku bo ta manehá un vehíkulo despues di kua a detené. A konfiská su reibeweis.
Aksidente entre outo i skuter
Djamars 27 di mei, alrededor di 12.15 or di mèrdia, ‘meldkamer’ sentral a risibí notifikashon tokante un aksidente entre un skuter i un outo riba Kaya Libertador Simon Bolivar. E outo a lora dilanti di e skuter, dor di kua e skuter a dal den e outo. Pa e motibu aki e shofùr di e skuter a resultá heridá riba kaminda. Ambulans a transportá e víktima pa hòspital pa tratamentu médiko. Konforme e maneho di ‘botsen is blazen’, a hasi un tèst di supla ku e shofùr di e outo, ku resultado negativo. Debí ku vários testigu a deklará ku e shofùr di e outo tabata na telefòn miéntras e tabata stür, Fiskal di Ministerio Públiko a duna òrdu pa konfiská e telefòn. E departamentu di tráfiko ta investigando e aksidente.