Tourism Corporation Bonaire (TCB) ta kontentu di por anunsiá ku nan a selektá TCB komo finalista di Routes Americas 2024 Awards, un prueba di e dedikashon di nos isla na mehorashon di konektividat, implementashon di kampañanan inovativo di merkadeo i stimulashon di nos sektor turístiko.
E selekshon a bini di nos partnernan di aviashon, ku a rekonosé e strategianan eksepshonal di desaroyo di ruta i e sosten di TCB durante e aña tras di lomba.
Na aña 2023 Boneiru a konosé un logro importante ku 169.706 bishitante stayover, loke a surpasá e sifranan di tantu aña 2019 i aña 2022. E prestashon akí ku ta kumpli ku e Indikadó Krítiko di Prestashon stipulá di 170.000 bishitante a base di e Plan Maestro Stratégiko pa Turismo di 2017, ta marka e di tres aña konsekutivo di kresementu a base anual di nos isla, loke ta un señal di progreso duradero den desaroyo di nos turismo.
E dedikashon di TCB na mehorashon di konektividat a kondusí na un progreso remarkabel, entre otro lantamentu di ‘gateway’-nan nobo manera Toronto ku WestJet i WinAir, banda di frekuensianan adishonal di partnernan di aviashon, entre otro TUI, KLM, Delta, American Airlines, United i mas. E mehorashonnan akí no solamente a engrandesé Boneiru su aksesibilidat, pero tambe a enrikesé e eksperensia di biahe pa nos bishitantenan.
“Nos ta honrá i agradesido ku nan a rekonosé nos komo finalista di Routes Americas 2024 Awards”, segun Miles B M Mercera, direktor di TCB. “E rekonosimentu akí ta suprayá nos esfuersonan kontinuo pa fortifiká Boneiru su konektividat i na mes momentu mantené nos enfoke riba profeshonalidat.”
TCB ta mantené su kompromiso pa kontinuá ku e prestashonnan di aña pasá i sigui oumentá Boneiru su forsa di atrakshon pa biaheronan di rònt mundu. Ku un dedikashon firme na kalidat i sostenibilidat nos ta anhelá pa kontinuá riba nos ruta di kresementu i desaroyo den sektor turístiko.
Durante e Routes Americas 2024 Networking Evening (na luna di mart di aña 2024) nan ta anunsiá e ganadónan di Routes Americas 2024 Awards na Bogota, Colombia. E evento akí lo sirbi komo un plataforma pa rekonosimentu di prestashon di aeropuertonan i destinashonnan den henter kontinente merikano i pa honra ekselensia den desaroyo di ruta.
Pa mas informashon tokante Routes Awards: