Politica

Parlamentario Alan Howell Construccion di caretera specialmente den barionan mester continua na Aruba


ORANJESTAD, Aruba

Parlamentario di POR, Alan Howell ta comenta cu ta importante pa desaroyo infrastructural na nos isla continua y pa tal motibo ta un necesidad pa sigura e fondonan p’esaki a traves di e reintroduccion di e Wegen en Infrastructuurfonds (WIF), fondo pa caretera y infrastructura, cu e actual Minister di Infrastructura a introduci durante un gobernacion anterior.
Alan ta un parlamentario cu for di inicio a para y a bringa duro pa construccion y mantencion di careteranan tuma luga na Aruba y ta gradici ex minister Otmar Oduber pa e atencion grandi cu el a duna na e aspecto aki y muy en especial pariba di brug.

Howell ta recorda cu dia 18 di augustus 2019 Parlamento a aproba un mocion presenta pa Fraccion di POR cu ta urgi gobierno pa reinstitui e fondo pa caretera mas lihe cu ta posibel pa sigura fondonan structural pa construccion y mantencion di nos careteranan na Aruba. Den e mocion aki ta stipula un fondo di 9 miyon Florin anual pa logra e metanan infrastructural, cual ta un forma tambe pa stimula nos economia.

Alan Howell ta confia cu durante tratamento di presupuesto 2020 por logra e meta di reinstitui e WIF y asina continua cu e construccion y mantencion di careteranan riba nos isla. Hopi bario por a mira un Adelanto caba ora cu despues di añanan finalmente nan a haya asfalt, pero ainda tin hopi mas cu mester mira esaki, mientras cu otronan ta sclamando pa haya un mantencion di e camindanan debi na e mal estado cu esakinan ta. Cu e 9 miyon anual structural riba presupuesto pa e metanan specifico aki, pueblo di Aruba en general lo por mira un adelanto grandi den nan bario, mientras cu ta stimula nos economia tambe, parlamentario di POR a finalisa.


Related posts

Lider di fraccion di AVP mr. Mike Eman Recorte salarial di maestronan di scol ta espantoso

EA News Author

Consul italiano di Maracaibo di bishita cerca Gobernador Boekhoudt

EA News Author

Lider di MEP Evelyn Wever-Croes: Partido Mep a celebra dia Internacional di Hende Muhe

EA News Author

Leave a Comment