Parlamentario Dangui Oduber a expresa preocupacion serio riba e intencion di Ministro di Asuntonan Economico, Geoffrey Wever, pa elimina e Canasta Basico, un medida cu segun Oduber ta afecta directamente e ciudadanonan di menos recurso na Aruba.
Segun Oduber, e Canasta Basico ta representa un instrumento esencial di proteccion social, ya cu e ta permiti cu productonan di prome necesidad wordo ofreci na un pijs maximo stipula door di gobierno, evitando subimento excesivo cu por pone esnan mas vulnerabel for di acceso na cuminda basico. Parlamentario Dangui Oduber a señala cu elimina e mecanismo aki ta debilita e siguridad alimenticio di hopi famia.
E parlamentario ta indica cu enbes di defende e interes di consumidor, e politica actual ta favorece comercio, algo cu, segun Oduber, ta contradeci e responsabilidad di gobierno pa proteha e poder di compra y e bienestar di pueblo.
Oduber tambe a cuestiona e proceso investigativo cu a wordo conduci pa medio di Aruba Fair Trade Authority (AFTA), un organismo cu, ta dirigi pa un director nombra pa e mes minister Wever mes. Kisas tin preocupacion riba posibel conflicto di interes?, señalando cu tin alegacion cu relacion politico ta influenciando e conseho cu AFTA a duna gobierno pa elimina e Canasta Basico posiblemente?.
Segun Oduber, gobierno AVP–FUTURO mester reflexiona riba e rol di liderazgo cu ta eherce, ya cu e prioridad mester ta empodera e ciudadano, controla inflacion, y mehora e calidad di bida. “Elimina e Canasta Basico ta bay den direccion opuesto,” Oduber a declara.
Cifranan publica di Central Bureau of Statistics (CBS) indica cu e poder di compra di Arubanonan a baha considerablemente, situacion cu Banco Central tambe a confirma den investigacionnan reciente. Segun e ultimo datonan, 88% di e participantenan den un encuesta di Banco Central a reporta un deterioro den nan poder di compra. Ademas, CBS a confirma cu e nivel di “bestaansminimum” a subi, mientras cu inflacion proyecta pa 2025 y 2026 ta mas halto cu proyeccionnan anterior.
Parlamentario Oduber a recorda cu durante campaña electoral, Ministro Wever a promete mehoracion den poder di compra y stabilidad di prijs, promesanan cu, segun Oduber, no a wordo cumpli despues di casi un aña di gobernacion.
E parlamentario tambe a critica e reciente aumento di Prijs di gas, señalando cu e decision a wordo tuma sin un necesidad economico claro, specialmente considerando cu Arugas ta opera como monopolio y ya tabata generando ganashi significativo.
Finalmente, Oduber a indica cu, apesar di Aruba tin actualmente un surplus di aproximadamente 500 miyon florin, gobierno no a enfoca suficiente riba proteccion di e gruponan mas vulnerabel. Segun Oduber, e politica economico actual ta sirbi mas bien interes comercial cu e interes general di Pais Aruba.